Zornade Mondiâl de Ipertension Arteriose: ai 17 di Mai dal 2025 ai 17 di Mai dal 2025
joibe 15 di Mai dal 2025
Consulencis e misurazion de pression tal Ospedâl di Udin
Sabide ai 17 di Mai dal 2025 si celebre la XXI Zornade Mondiâl cuintri de Ipertension Arteriose, promovude in dut il mont de World Hypertension League.
E sarà organizade une schirie di iniziativis in simultanie intes placis di dutis lis plui impuartantis citâts talianis par cure dai Centris di Ecelence pe Diagnosi e la Cure de Ipertensions locâi, sot dal coordenament de Societât Taliane de Ipertension Arteriose (SIIA) cul obietîf di sensibilizâ il public sui pericui che al cor cui che al à une pression arteriose alte e no le cure in maniere corete.
Ancje a Udin si podarà fâ, in maniere gratuite, une misurazion precise de pression arteriose e vê informazions detaiadis su cheste patologjie de bande di miedis esperts dal Centri Ipertension de Cliniche Mediche.
Sabide ai 17 di Mai, des 10 aes 13, tal plan tiere dal paveon 8 (ingrès di vie Culugne 50), e sarà ative une postazion fisse cuntun grup di miedis dal Centri di Ecelence de Cliniche Mediche che al sarà supuartât di personâl de Crôs Rosse Taliane.
La ipertension arteriose
Di fats, la ipertension arteriose, par vie de sô enorme difusion, e je il plui impuartant dai fatôrs di pericul cardiovascolâr. In Italie e tocje cirche il 35% de popolazion cun plui di cuarante agns e e je la cause principâl di infart cardiac, ictus, demence e insuficience renâl, ven a stâi des causis plui comunis di muart e invaliditât tai Paîs industrializâts.
In chest sens la ipertension arteriose e pues jessi definide tant che un “sicari cidin”, stant che la pression superiôr ae norme par solit no presente sintoms e la plui part dai sogjets cun ipertension si inacuarç di vêle dome cuant che se misure par câs.
Indagjins epidemiologjichis puartadis indenant su milions di personis di ducj i continents a dimostrin, par altri, che la ipertension arteriose e je il prin fatôr responsabil de mortalitât gjenerâl tal mont. Cun dut di chest impat sociâl pardabon grant, la cussience dai pericui une vore seris pe salût leâts a cheste patologjie e je avonde basse tal public gjenerâl.
Une indagjin puartade indenant in Italie e à mostrât che il 15% dai talians nol à mai misurade la pression arteriose, il 33% nol sa ce che e je la ipertension, il 67% nol à mai ricevût informazions coretis su cheste cundizion patologjiche e dome il 33% di chei che le àn al fâs lis terapiis justis te maniere corete, ancje se in dì di vuê a son a disposizion medisinis eficacis e che in sostance no àn efiets colaterâi.