Fassicul Sanitari Eletronic: oposizion al pregrès
vinars 26 di Avrîl dal 2024
Dai 22 di Avrîl ai 30 di Jugn al è pussibil oponisi al inzornament dal FSE cui documents sanitaris creâts prin dai 19 di Mai dal 2020
Daûr dal articul 11 dal Decret Leç n. 34 dal 2020, dai 19 di Mai dal 2020 il Fassicul Sanitari Eletronic (FSE) al è stât ativât in maniere automatiche par ducj i residents in regjon.
Ogni singul FSE al ven inzornât in maniere costante cu la documentazion cliniche che lis struturis publichis a produsin e che e ven firmade a nivel digjitâl, tant che referts, letaris di dimission, verbâi di pront socors, esams di laboratori. Chescj documents sul “stât di salût” di ogni assistût a puedin jessi consultâts e condividûts cun ducj i professioniscj sanitaris se il citadin lu autorize.
Daûr des disposizions de Autoritât Garante pe protezion dai Dâts Personâi, dopo dai 30 di Jugn dal 2024, se no je une oposizion esplicite, il FSE al vignarà inzornât in maniere automatiche ancje cui dâts sanitaris digjitâi di events clinics prin dai 19 di Mai dal 2020 (chel che al ven clamât “pregrès”).
Dai 22 di Avrîl ai 30 di Jugn dal 2024 al sarà pussibil oponisi al inzornament dal pregrès cun chestis modalitâts:
- Online sul Portâl “Sistema Tessera Sanitaria”:
1. Cence identitât digjitâl (doprant il codiç fiscâl, il numar de Tessare Sanitarie e la sô date di scjadince).
2. Cu la identitât digjitâl (midiant dal SPID, de Cjarte di Identitât Eletroniche o de Tessare Sanitarie ativade cul pin).
- Te Aziende Sanitarie di riferiment, là che i operadôrs a saran a disposizion par judâ: in ASUFC i operadôrs individuâts a son chei dai sportei de Anagrafe Sanitarie dai Distrets.
Par vê plui informazions sul argoment si pues consultâ il materiâl informatîf de campagne nazionâl, tal portâl dedicât dal Ministeri de Salût.