Emergjence cjalt

Lis temperaduris parsore dai 32-35 °C, massime se il tas di umiditât al è une vore alt, a puedin vê efiets negatîfs su la salût. In cundizions normâls, il cuarp si disfrede midiant de sudorazion, ma in ciertis cundizions fisichis e ambientâls chest nol è avonde. Duncje al è fondamentâl prevignî lis patologjiis peadis al cjalt, cjapant lis precauzions justis cun prontece.

Si ricuarde che fra lis categoriis plui in pericul a son i fruts, lis feminis in gravidance, i anzians e chei che a àn patologjiis. Chestis personis a fasin plui fadie a adatâsi al cjalt, e par chest motîf si à di viodi di lôr cun plui atenzion.
Lis cundizions di emergjence leadis ae bugade di cjalt a puedin vê efiets negatîfs ancje su la salût des personis sanis e ativis e no dome su chês plui vulnerabilis des categoriis ditis sore.

Plui e dure la bugade di cjalt, piês a son i efiets negatîfs su la salût.
Par chest motîf si racomande di lâ daûr dai sugjeriments e des racomandazions par contrastâ il cjalt masse fuart:

• bevi dispès, ancje se no si à sêt, almancul 1,5 litris di aghe in dì, evitant lis bevandis zucaradis e l'alcul
• doprâ vistîts lizêrs, larcs, miôr se di fibris naturâls tant che il coton
• lâ fûr di cjase tes oris mancul cjaldis de zornade
• fâ pascj lizêrs cun pomis, verduris e aliments frescs, evitant di doprâ il for e altris eletrodomestics che a fasin cjalt, come il suiecjavei e il fier di sopressâ.

In plui si consee di fâ docis cun aghe clipe, par evitâ cambiaments di temperadure improvîs, di rinfrescjâ la cjase di sere o a buinore par cambiâ l'aiar e soredut di no lassâ mai, nancje par pôc timp, personis o animâi dentri di machinis parcadis in batude di soreli.