Donazion des associazions “Amici di Borgo Sacco” e “Udinese Club 33038" ae Pediatrie di San Denêl: une belance par pesâ i frutins a pene nassûts

Miercus ai 5 di Jugn, te Pediatrie di San Denêl, cuntune piçule cerimonie e je stade regalade une belance par pesâ i frutins a pene nassûts, une donazion di dôs associazions locâls, o sedi de associazion “Amici di Borgo Sacco” e dal “Udinese Club 33038," unidis in cheste opare gjenerose.

Cheste atenzion "e rapresente pai citadins une maniere ative di partecipâ e e jude la comunitât a sintîsi ancjemò plui unide", e à dit la dotore Maria Paola Miani, diretore de pediatrie dal presidi ospedalîr di San Denêl.

Ae cerimonie, cu la dotore Miani a jerin ancje miedis e infermîrs de struture: la Infermiere Sarah Di Giusto che e rapresentave la Direzion mediche dal Ospedâl, i Presidents des dôs Associazions, Elisa Tomè pe associazion “Amici di Borgo Sacco" e Giovanni Michelin pe associazion "Udinese Club 33038" cun cualchi component dai doi diretîfs, e pe Aministrazion comunâl, la Assessore Daniela Cominotto e il Conseîr Dimitri Quaglia.

La belance, che e coste cirche 800 euros, e je un imprest une vore impuartant, doprât te struture ogni dì. "Controlâ il pês di un frutin a pene nassût o di un plui grant al è un dât fondamentâl par valutâ la salût dai piçui pazients. O ringraciìn di cûr lis dôs associazions che in chest câs a àn dimostrât cemût che si fâs scuadre cu la union des fuarcis, dant valôr e concretece ae famose detule "Lis gotis metudis dongje a fasin il mâr", e à concludût la dotore Miani.