Danieli e ABS a donin ae Cliniche Pediatriche di Udin un strument pal imaging mobil

Miercus ai 16 di Avrîl, te sale riunions de Cliniche Pediatriche di Udin, cuntune cerimonie al è stât consegnât ae Struture dal Sante Marie de Misericordie un imprest pal imaging mobil. A jerin presints il Diretôr Gjenerâl di ASUFC, Denis Caporale, i presidents di Acciaierie Bertoli Safau e Danieli & C. Officine Meccaniche, Camilla Benedetti e Alessandro Brussi.

La donazion e je stade fate graciis al contribût des ditis Danieli e ABS che, ancjemò une volte, cul lôr impegn intal sociâl a dimostrin di jessi dongje de realtât ospedaliere, de comunitât di Udin e di dut il teritori, cuntune azion concrete a pro dai pazients e dai professioniscj.

Il strument

Intal detai, al è un Miniarc a C Orthoscan model TAU 1515 che al covente pe visualizazion radiologjiche intal tratament des patologjiis ortopedichis, massime chês traumatichis, su articolazions e estremitâts.  Al coventarà pal tratament dai pazients pediatrics che a rivin dal Pront Socors Pediatric. I vantaçs dal strument a son tancj parcè che si pues doprâlu une vore cun facilitât, al furnìs imagjins di alte cualitât e, no ultin, al mande fûr sul pazient une cuantitât basse di radiazions.

Il diretôr de Ortopedie, dotôr Lucio Bonometto: "Al permetarà di concentrâ lis ativitâts assistenziâls ridusint il timp che al passe tra il traume e il tratament, che al podarà jessi gjestît dal dut e daurman intal Pront Socors Pediatric, cu la assistence che e covente dal pediatre inte procedure par garantî une cualitât otimâl dal intervent. In tancj câs, il frut al podarà tornâ a cjase za cul tratament definitîf adeguât".

Al è un strument une vore doprât te chirurgjie ortopediche e pe diagnostiche midiant di imagjins digjitâls: al rapresente la soluzion ideâl pe fluoroscopie des estremitâts cun nivei di dose minims. In plui, pal fat che al è lizêr, al è facil di doprât tai spazis strents, tes salis operatoriis, e al pues jessi trasferît di une sale di esam e chê altre.

Lis declarazions

"Graciis a cheste donazion - e declare la professore Paola Cogo, diretore de Cliniche Pediatriche di Udin - si podarà realizâ un percors assistenziâl multidissiplinâr dedicât al frut che al rive tal Pront Socors cuntun braç o une gjambe rote. La scuadre ortopediche e chê dal Pront Socors Pediatric a lavoraran adun par ridusi e par stabilizâ la frature dal frut intes stanziis dal Pront Socors Pediatric, cence vê di puartâlu intal Pront Socors Ortopedic.  Il metodi multidissiplinâr al garantirà che il frut nol sinti il dolôr che al ven dal tratament e al permetarà ai gjenitôrs di podê stâ simpri dongje dal frut par fâlu stâ seren e cuiet".

Chest progjet si inserìs tal ambit dal percors di "Umanizazion des curis e dal benstâ organizatîf in ASUFC, lant daûr sedi ae prospetive cliniche assistenziâl che ae prospetive organizative gjestionâl. ASUFC in colaborazion cu la Universitât dal Friûl, e à publicât la Cjarte di Udin su la umanizazion des curis proponint un mudament dal model di cure, contribuint al dialic costrutîf pal inseriment inte leç di belanç 2025 di 4 comis su chest teme, par tacâ une fase sperimentâl intai ospedâi talians.

Il Diretôr Gjenerâl, dotôr Denis Caporale: "O ringracii une vore Danieli e ABS par cheste donazion, une azion concrete di atenzion pe salût dai fruts e pe comunitât: e je une altre buine azion pe nestre realtât che e contribuìs cun continuitât ae incressite di ASUFC midiant di imprescj modernis e avanzâts.

La dotore Camilla Benedetti: "Cun cheste donazion, ABS e conferme il so impegn a pro dal benstâ des gnovis gjenerazions. O sin contents di podê ufrî un contribût par puartâ in miôr e tutelâ la salût dai plui piçui. O crodìn che podê vê a disposizion tecnologjiis medichis plui siguris e modernis, massime in ambient pediatric, al sedi un fat fondamentâl par costruî une societât plui evolude che e cjale al doman".

Il dotôr Alessandro Brussi: "Tal 2025 Danieli e fâs une altre donazion al ospedâl di Udin, dopo dal contribût dât tal 2024 par mandâ un segnâl concret a pro de comunitât furlane e cheste volte pai pazients plui zovins, par garantîur la assistence miôr disponibile in dì di vuê, e par tutelâ di plui il lôr avignî".