ABS Acciaierie e Danieli dongje de ASUFC: donazion par ricualificâ lis salis operatoriis e par instalâ un angjiograf tal Ospedâl di Udin
lunis 17 di Lui dal 2023
La cure pal propri teritori e passe ancje pe atenzion ae salût dai citadins che a vivin li. Al è chest il principi ae fonde de iniziative puartade indenant de ABS-Acciaierie Bertoli Safau S.p.A. e Danieli & C. Officine Meccaniche S.p.A. che e permetarà ae ASUFC di ricualificâ lis salis operatoriis dal ospedâl Santa Maria della Misericordia.
Tal detai, l’intervent al jentre te “Manutenzion straordenarie spazis tal plan semisoterani” e al interessarà la ricualificazion des salis operatoriis dal paveon cinc cu la instalazion di un angjiograf.
Il machinari al sarà metût te gnove sale emodinamiche e al sarà destinât soredut a intervents di eletrofisiologjie ma al sarà util ancje par intervents di emodinamiche e/o implants di valvulis cardiachis par vie transcutanie.
Tal specific, il sisteme “Artis zee” – di costruzion Siemens – al è montât a paviment par l’imaging intervenzionâl che al permet une grande sielte di configurazions e di aplicazions 3D. Si pues doprâ par specialitâts diferentis e la machine e furnìs une imagjin precise e tridimensionâl des areis cerebrâls, adominâls e periferichis dai pazients, rindint plui sigûr il procès decisionâl.
Il machinari in cuistion al vignarà destinât in maniere principâl par aplicazions di eletrofisiologjie, tant che posizionament di catetars par pacemakers/defibriladôrs implantabii, ablazions cardiachis pe corezion de aritmie e mapaduris cardiachis.
Lis funzionalitâts de gnove strumentazion si puedin impleâ ancje par altris tipologjiis di intervent, tant che angjioplastiche cardiache e periferiche, implants valvolârs mini invasîfs par vie endovenose e intervents vascolârs min invasîfs in gjenerâl.
La conclusion dal intervent, la instalazion dal gnûf machinari e i varis colauts si previodin dentri de Primevere dal 2024.
La ricualificazion e à un valôr totâl di 990.000€, di chescj 190.000€ di finanziament regjonâl e 800.000€ di contribût in gracie di ABS Acciaierie Bertoli Safau S.p.A. e di Danieli & Co. Officine Meccaniche S.P.A.: la firme sul at notori e je stade metude îr di buinore tai uficis ABS.
Chest aparât al va a slargjâ e a rinfuarçâ il parc angjiografic dal Ospedâl di Udin a disposizion de Cardiologjie Interventistiche, puartant la dotazion corinte di doi a trê machinaris: chest al garantirà un aument des risorsis disponibilis sedi tes situazions di emergjence improvise che in chês normâls, ma essenziâls, pes fermadis manutentivis dai machinaris.
“L’impegn tal sociâl di Abs Acciaierie Bertoli Safau e dal Gruppo Danieli ju viôt ancjemò une volte in prime linie a pro de comunitât dal Friûl-Vignesie Julie. Un at vêr, concret, tipic de realtât “dal fâ” che di simpri al caraterize la lôr mission: une opare imprenditoriâl, stimade e preseade in dut il mont, che no si dismentee de sô tiere e des sôs necessitâts. La donazion significative e va a pro dal citadin e dai nestris professioniscj de salût. E rinfuarce la aleance, fondamentâl, tra public e privât. E conte di cui che al fâs imprese, no cence fature, cun sens etic e responsabilitât sociâl” lis peraulis dal Assessôr regjonâl ae Salût dal Friûl-Vignesie Julie, Riccardo Riccardi.
Il Diretôr gjenerâl, dot. Denis Caporale: “Tant che Diretôr, o soi braurôs di ringraciâ ABS e Danieli pal sfuarç economic impuartant par supuartâ l’Ospedâl di Udin e dute la ASUFC. I intervents previodûts a jentrin intun plan di miorament de logjistiche, dai machinaris e des risorsis in gjenerâl par jessi simpri al pas cu la inovazion e dâ ae popolazion lis rispuestis di salût che e à bisugne”.
“Il nestri Grup si è simpri interessât al contest dulà che al lavore”, e comente Camilla Benedetti, Presidente ABS Acciaierie Bertoli Safau e Vicepresidente dal Gruppo Danieli, “Al è cun chest spirt che o vin pensât di contribuî ae comunitât midiant di une ecelence sanitarie locâl come l’ospedâl Santa Maria della Misericordia, dant un jutori par ampliâ i servizis ufierts de struture, sburtant e incrementant lis ricjadudis sul teritori”.