Centri Regjonâl pai Traplants: il 2024 al è stât un an straordenari

Tra i dâts pandûts, a risaltin i numars sui traplants fats tal 2024: 29 di cûr, 43 di fiât, 60 di rognon, par un totâl di 132 traplants. In Friûl-Vignesie Julie al è stât un aument sedi dal numar di donadôrs potenziâi segnalâts, graciis al lavôr fat pal plui tes Terapiis Intensivis, sedi dal numar di donadôrs di fat doprâts, ancje par vie dal calâ impuartant des oposizions ae donazion.

Chest al à puartât a un numar mai tocjât prin di 132 traplants di orghins solits (ven a stâi 110 traplants par milion di abitants, un dât une vore dongje dai 120 de Spagne, e tant plui alt de medie nazionâl). Tra chescj, il numar di traplants di fiât (43) al segne un primât storic pe regjon: dal 1996 a Zenâr dal 2025, si regjistrin in dut 824 traplants di chest orghin.

Cun di plui, la ativitât di donazion di tiessûts e je incressude: 360 donadôrs di corniis e 20 donadôrs di multitiessût, cuintri dai 8 dal 2023, cuntune riduzion consecuente de fuide di pazients. Si à rivât a otignî chest risultât midiant de colaborazion tra CRT, Direzions sanitariis, hospice e reparts di degjence dai diferents presidis ospedalîrs de regjon.

“Chescj sucès no rivin mai par câs, ma cul lavôr, cu la fature, cu la capacitât di puartâ indenant chel che altris a àn tacât e cul vierzisi a gnovis esperiencis, determinantis par frontâ lis sfidis che nus spietin” – al declare l’Assessôr regjonâl ae Salût, Riccardi.

“Graciis ae sinergjie tra i professioniscj dal Sisteme sanitari regjonâl, des terapiis intensivis, dai Centris di traplant (CRT), des Direzions aziendâls, dai citadins e des associazions di volontariât, tal 2024 te nestre regjon si son otignûts risultâts ecelents tal cjamp de donazion e dai traplants. A ducj lôr ur va il nestri agrât plui grant”.

Il CRT, cul supuart de Direzion centrâl Salût, al à puartât indenant lis ispezions di valutazion dai coordenaments ospedalîrs de ASUFC e di Gurize-Monfalcon, par rinfuarçâ la stabilitât de rêt regjonâl. Lis iscrizions intal Regjistri regjonâl dai donadôrs di medole ossie a àn regjistrât un aument dal 30% a pet dal 2023, passant il primât storic tocjât tal 2019.

Vie pal event al è stât ancje ricuardât il progjet regjonâl "Zornadis informativis su la salût, la prevenzion e l’at dal donâ a scuele", inviât intai mês passâts. La iniziative, ativade in maniere coordenade dai assessôrs ae Salût e ae Istruzion, e cjape dentri la Direzion scolastiche regjonâl, il Centri regjonâl pai traplants, il Centri regjonâl pal sanc e lis associazions di volontariât che a son za impegnadis cu la lôr opare di divulgazion tes scuelis dal Friûl-Vignesie Julie. Il progjet tal 2024 al à interessât passe 7.000 students.

Infin, te conference stampe, inmaneade adun cul Ordin dai Miedis di Udin, e je intervignude la presidente Anna Maria Bergamin Bracale, che e à ilustrât il progjet “Students in prime linie”, Il progjet al è nassût dal percors “Curvadure biomediche”, ideât di Guido Cappelletto, par disvilupâ gnovis formis di comunicazion pai zovins su la impuartance de donazion dai orghins. Di cualchi an incà l’Ordin dai Miedis lu puarte intes scuelis, cu la partecipazion dai liceus sientifics Copernico e Marinelli di Udin.

Graciis ae colaborazion tra la Direzion regjonâl Salût, la ASUFC e i istitûts scolastics, cinc students a àn vude la pussibilitât di assisti a un traplant dal rognon. Al è un progjet unic a nivel nazionâl, che al à riclamât la atenzion des associazions regjonâls dai traplants di orghins. Riccardi al à marcât la impuartance di cjapâ dentri i zovins: “I students a àn profitât di cheste oportunitât, mostrant interès e sensibilitât par un teme cruciâl pe salût publiche.”

Font Regjon F-VJ