Si son diplomâts i prins Operadôrs Sociosanitaris dal cors de ASUFC

Cui esams finâi si è sierade la prime edizion dal cors di cualifiche par Operadôr Sociosanitari – OSS gjestît de ASUFC midiant de Struture “Formazion e Valorizazion dal personâl”, che e à garantît lis proceduris di progjetazion, di selezion e di organizazion de ativitât didatiche e di tirocini.

Il cors, che al è durât in dut 1000 oris, al è tacât ae fin di Avrîl e si è disvilupât cun 534 oris di teorie, fatis inte sale dal Dipartiment di Prevenzion de ASUFC, 450 oris di tirocini e 16 di esams finâi, che si son davuelts devant de Comission nomenade de Regjon F-VJ.

I arlêfs a àn fat dôs provis: une teoriche cun 60 domandis a rispueste multiple e une di simulazion pratiche leade ai procès lavoratîfs plui impuartants a nivel sociosanitari. Cheste ultime prove e je stade fate intai spazis di simulazion che la ASUFC e à predisponût di pueste inte sede dal cors.

Ducj e 19 i arlêfs ametûts al esam a àn passât lis provis cun valutazions une vore buinis e cui compliments de Comission, otignint un Atestât di cualifiche professionâl di “OPERADÔR SOCIOSANITARI”, che al corispuint al nivel 3 dal EQF (European Qualification Framework).

Il dot. Denis Caporale, diretôr gjenerâl de ASUFC e la dot.e Marina Barbo, responsabile pe Formazion e pe Valorizazion dal personâl, a àn palesât la lôr sodisfazion pal risultât otignût ancje in gracie de colaborazion furnide dal diretôr dal cors, dal grup di lavôr de Formazion e dai docents – tutôrs professioniscj di cheste Aziende intervignûts intal percors.

Daûr de programazion, si è daûr a inviâ la seconde edizion dal cors OSS 1000 di oris che al finirà intal 2023.