ARLeF e Regjon F-VJ insiemi pe sanitât e pal sociâl
martars 7 di Fevrâr dal 2023
Presentade la version furlane dal sît de ASU FC e il video realizât pe ADMO che al spieghe ai zovins il valôr de donazion de medole dai vues
La lenghe furlane tant che mieç di comunicazion par jessi simpri plui dongje dai citadins intal setôr sanitari e sociâl. Chest al è stât il teme de conference stampe clamade dongje de Regjon F-VJ e de ARLeF par presentâ doi progjets impuartants: la version par furlan dal sît istituzionâl ASU FC e il video “Salve une vite!” , realizât pe Admo Fvg, cui fantats di YoupalTubo che a invidin i coetanis a notâsi tal Regjistri nazionâl talian dai donadôrs di medole dai vues.
Vie pal incuintri, ospitât vuê a buinore tal palaç de Regjon a Udin, a son intervignûts Riccardo Riccardi, vicepresident de Regjon Autonome Friûl-Vignesie Julie e assessôr ae salût; Pierpaolo Roberti, assessôr regjonâl aes autonomiis locâls; il president de ARLeF - Agjenzie regjonâl pe lenghe furlane, Eros Cisilino; il diretôr gjenerâl de Aziende sanitarie universitarie dal Friûl di Mieç (ASU FC), Denis Caporale, e Paola Rugo, presidente de Associazion Donadôrs di Medole dai Vues - Admo Fvg.
IL SÎT DE ASU FC PAR FURLAN
La version par furlan dal sît de Aziende sanitarie universitarie dal Friûl di Mieç e je une novitât impuartante e in linie cu lis indicazions dal "Plan gjenerâl di politiche linguistiche pe lenghe furlane 2021-2025". Al è un imprest impuartant par dialogâ e par dâ informazions utilis ae utence che e fevele furlan (a son passe 500.000 i citadins che a fasin riferiment ai Distrets sanitaris di Udin, Cividât, Codroip, Glemone, Tisane, Palme, San Denêl, Tarcint e Tumieç) e che si zonte a altris azions impuartantis di comunicazion plurilengâl metudis in cjamp de Regjon, tant che lis campagnis di vacinazion cuintri de influence. La colaborazion tra ASU FC e ARLeF e à puartât ae traduzion furlane des sezions plui consultadis de utence (contignûts simii a son ufierts in lenghe slovene e todescje) e a son za in program altris inzornaments dopo dal restyling dal sît de Aziende sanitarie. Lavorâ adun cu la Agjenzie al à puartât ancje une altre azion di comunicazion plurilengâl significative: di cualchi mês, di fat, i maxischermis dal paveon di jentrade dal ospedâl Sante Marie de Misericordie di Udin a ufrissin ai utents informazions sanitariis e di servizi ancje in lenghe furlane.
«A son valôrs di fonde chei che o volìn comunicâ cun cheste gnove iniziative che e cjape dentri la Regjon, la Agjenzie regjonâl pe lenghe furlane, la Aziende sanitarie universitarie Friûl di Mieç e la Associazion donadôrs di medole dai vues dal Friûl-Vignesie Julie, par podê rivâ a ducj ancje midiant de lenghe furlane, fevelant di salût e dal donâ: un at che al è ispirât di doi principis impuartants, ven a stâi la gratuitât e l’anonimât», al à declarât il vicepresident de Regjon Autonome Friûl-Vignesie Julie e assessôr ae salût, Riccardo Riccardi.
«La finalitât e je, in sens gjenerâl, chê di fâ capî un messaç di fonde che o stimìn fondamentâl: chel che il furlan e dutis lis lenghis minoritariis no son lenghis di fevelâ dome in cualchi contest, e di evitâ in altris; a àn di jessi dopradis in ducj i contescj, de famee ai amîs, dal lavôr ai rapuarts cu lis istituzions. Dome cussì o rivarìn a salvâ une lenghe e a promovile, a fâle disvilupâ, a fâle cressi ancjemò di plui, cul obietîf principâl di garantî ai nestris citadins il dirit, ricognossût de Costituzion, di podê esprimisi doprant la lôr lenghe, tignintle di cont dutune cu lis propriis lidrîs», al à ricuardât l’assessôr regjonâl aes autonomiis locâls Pierpaolo Roberti.
«Al jere dovût, pe Aziende che e rapresente il teritori de ex provincie di Udin, vê il sît istituzionâl ancje inte lenghe dal contat cuotidian e des personis di cheste tiere - al à declarât il diretôr gjenerâl ASU FC, Caporale - o savìn trop che al sedi impuartant cjatâ intun servizi, soredut se si trate di salût, un leam identitari. O ai agrât ae ARLeF pe colaborazion che no si esaurìs dome tal portâl web, ma che nus da struments par svicinâ lis personis ai nestris servizis, favorint ancjemò di plui une anime furlane tal servizi sanitari regjonâl».
«La Aziende sanitarie universitarie dal Friûl di Mieç, tal doprâ la lenghe furlane ancje tal so sît, e dimostre di jessi ancjemò plui dongje dai citadins, e par nô al è stât un plasê contribuî a chest progjet che, o ricuardi, al cor tal agâr segnât metint adun il Pgjpl - al à marcât il president de ARLeF, Eros Cisilino -. Si trate di un risultât impuartant, che si è realizât in graciis dal sostegn costant de bande de Regjon Autonome Friûl-Vignesie Julie, e par chest o ringracii il vicepresident Riccardi che si è mostrât dal moment sensibil al teme, e l’assessôr Roberti che al sta daûr simpri aes nestris ativitâts; in plui che il diretôr de ASU FC, Caporale, pe sô grande disponibilitât».
IL VALÔR DAL DONÂ LA MEDOLE DAI VUES CONTÂT MIDIANT DI YOUPALTUBO
YoupalTubo al è il canâl YouTube cun protagoniscj un grup di fantats furlans. Midiant dal canâl, une vore preseât dai lôr coetanis (si contin passe 9.500 iscrits e plui di 20.000 oris di visualizazion), a contin lis lôr passions, cun contignûts e curiositâts sul Friûl. Tal video presentât vuê in Regjon, i 8 youtubers furlans a àn volût metisi in zûc suntun teme impuartant: trasmeti ai lôr coetanis la impuartance di salvâ une vite graciis ae donazion di medole dai vues. Come simpri, il lôr stîl al è lizêr, ma il teme al è dal dut seri e i fantats lu frontin cun sensibilitât: pe Admo al è fondamentâl rivâ ai fantats e aes fantatis fra i 18 e i 35 agns, in buine salût e cuntun pês sore dai 50kg. La sielte di fâlu in colaborazion cu la ARLeF e la clape di YoupalTubo «e je peade ae pussibilitât di vierzi un altri canâl di dialic cui zovins che e partissi propit di lôr – e à marcât Paola Rugo, presidente de Admo Fvg che e je impegnade sul teritori intune vore di ativitâts, tant che lis cunvignis intai istitûts scolastics -. Il canâl YouTube nus à parût subit un strument bon par vê un contat cun pussibii gnûfs donadôrs di medole dai vues. I fantats di YoupalTubo a àn realizât une clip che e rivarà al cûr dai lôr coetanis, fasintjur capî che nol è nuie ce ve pôre ma che, al contrari, notâsi tal regjistri dai donadôrs al rapresente un at di gjenerositât e une grande pussibilitât, ven a stâi chê di salvâ une vite. O dîs graciis ae ARLeF e ai fantats par cheste oportunitât e o invidi ducj a cjalâ il video par savê di plui».
«La colaborazion cun Admo Fvg e je nassude di un pôc di timp - al à ricuardât il president de ARLeF, Eros Cisilino -. Si trate di une associazion che e fevele cui zovins, par chest o crôt che il video realizât dai fantats di YoupalTubo al sedi un contribût valit tal pandi il messaç de impuartance de donazion di medole dai vues e par judâ a incressi ancjemò di plui la cussience su chest argoment».