Vacinis par pazients oncologjics: a Udin in vie sperimentâl un ambulatori dedicât
martars 14 di Novembar dal 2023
La Aziende Sanitarie Universitarie Friûl Centrâl e à inviât ai 31 di Avost stâts un gnûf servizi di “vacinazion in repart” dedicât ai malâts oncologjics. De colaborazion tra la Oncologjie di Udin, direte dal dot. Gianpiero Fasola, e il Servizi Vacinazions de Igjiene e Sanitât Publiche, diret de dot.e Francesca Valent, al è nassût un ambulatori vacinâl dentri de Oncologjie di Udin, dulà che une volte par setemane i pazients oncologjics a puedin ricevi lis vacinis racomandadis.
Il gnûf servizi al fâs buinis lis indicazions dal Plan Nazionâl Prevenzion Vacinâl 2023-2025 che al promôf, midiant di une colaborazion tra miedis specialiscj, Oncolics in chest câs, e miedis vacinolics, “intervents vacinâi tai grups di popolazion cuntun risi alt par vie de patologjie, favorint une metodiche incentrade su lis esigjencis dal pazient”.
Propit cun chest obietîf e je stade ideade e organizade la colaborazion tra lis dôs struturis de Aziende Sanitarie: l’Oncolic al individue, tra i pazients che al assist e che al cognòs, i candidâts ideâi pal percors vacinâl, tignint cont des lôr carateristichis individuâls e clinichis, e ju prenote intune agjende vacinâl risiervade ai malâts oncologjics. L’igjienist dal Servizi di Igjiene e Sanitât Publiche, espert in materie di vacinazions, al prepare un plan vacinâl personalizât par ogni pazient, tignint cont de storie vacinâl passade, de patologjie di fonde e des terapiis che al fâs e, se al covente, confrontantsi cul Oncolic che al à in cure la persone. Il dì dal apontament, il pazient si presente tal ambulatori vacinâl tai locâi de Oncologjie che i sta daûr, dulà che al cjate il personâl de Igjiene e Sanitât Publiche par soministrâi lis vacinis.
Tra lis vacinis racomandadis pal pazient oncologjic, chês proponudis plui dispès a son chê cuintri de Haemophilus influenzae di tipo b, lis vacinis cuintri dal meningococ B e ACWY, la vacine antipneumococic, la vacine cuintri dal Herpes Zoster e, in Autun, la antiinfluençâl e chê cuintri dal Covid, malatiis che tal pazient oncologjic al è plui facil che si verifichin o che a puartin a consecuencis plui seriis a pet dal rest de popolazion gjenerâl.
Il model organizatîf descrit, che al covente a facilitâ lis vacinis racomandadis tai pazients oncologjics, al è stât inviât in vie sperimentâl a Udin, dulà che a son za stadis cjapadis in caric 25 personis, ma in prospetive si podarà espuartâ in altris sedis de Aziende Sanitarie.
Cheste strategjie, tra lis primis in Italie, e je stade valorizade de publicazion su la riviste sientifiche Tumori Journal (“A shared vaccination ambulatory for patients with cancer in Udine, Italy”; https://journals.sagepub.com/doi/10.1177/03008916231208622).