Ospedâl di Udin: confermade pe unitât senologjiche la certificazion di centri european di ecelence pal tratament dal cancar mamari
lunis 3 di Avrîl dal 2023
Ai 16 di Març dal 2023 la Unitât Senologjiche dal Ospedâl di Udin e à vût la conferme de certificazion EUSOMA (European Society of Breast Cancer Specialists) tant che centri european di ecelence pal tratament dal cancar mamari.
La Unitât Senologjiche dal Santa Maria della Misericordia e je ative di agns: la sô costituzion e je stade uficializade cuntun decret dal Diretôr Gjenerâl intal Març dal 2021 e intal Mai dal stes an e à otignude la prime certificazion, confermade intal 2022 e po ai 16 di Març passâts. Dome tal 2022 e à tratât 360 gnûfs câs di tumôr par un totâl di 648 intervents chirurgjics.
E je formade di un grup di professioniscj esperts e cualificâts te cure dal cancar dal pet; il lavôr al è organizât dentri di un percors terapeutic (PDTA) che al previôt di stâi daûr ae paziente in dutis lis fasis: de prevenzion ae cure, fin ae riabilitazion e al so reinseriment inte vite ative.
La sielte di rivâ a otignî la certificazion EUSOMA e je stade fate par orientâ i procès di cure e di assistence bande standards di cualitât, di ecuitât, di trasparence e di eficacitât intai risultâts, par vê standards di ecelence internazionâi tant che ponts di riferiment e par promovi la culture dal miorament continui.
Il tumôr dal pet al è la neoplasie plui frecuente intes feminis, in Italie a son plui di 50.000 câs ogni an e di chei cirche 1200 in Friûl-Vignesie Julie. Intai ultins agns, ancje se la incidence e je aumentade, il tas di mortalitât al continue a planc a calâ; la diagnosi simpri plui precoç in gracie dai programs di screening e di imprescj diagnostics simpri plui sofisticâts, adun cun terapiis simpri plui buinis e smiradis, a àn miorât une vore la prognosi.
La leterature sientifiche e dimostre che lis pazientis curadis intes Unitâts Senologjichis certificadis a vivin di plui e a son tant plui sodisfatis des curis vudis, cence tignî cont dal gjenar di malatie.
La sorevivence plui alte si coleghe cuntun percors diagnostic e terapeutic coret e struturât dentri des Unitâts Senologjichis, costituidis in Europe e in Italie za di un pôc di timp; in ogni câs dai 256 centris di Senologjie talians, dome 23 a àn otignût chest ricognossiment prestigjôs.
“La certificazion - e comente la responsabile dotore Cedolini - e conferme la cualitât alte des nestris prestazions, garantidis e coordenadis di une impostazion multidissiplinâr: radiologjie senologjiche, anatomie patologjiche chirurgjie senologjiche, oncologjie, medisine nucleâr, chirurgjie plastiche e di ricostruzion, radioterapie, gjenetiche mediche, psicologjie, fisiatrie e riabilitazion, gjeriatrie, curis paliativis, maternitât assistude, associazions di volontariât e tant altri. Nol è stât facil zontâ altri lavôr cun dut de pandemie, ma cu la coesion dal grup e la integrazion des diviersis figuris professionâls, l'obietîf al è stât centrât e par chest e pal sfuarç fat o ringracii ducj. La valutazion e je stade une vore buine e cumò o sin pronts par gnovis sfidis”.
Il prossim travuart, anunziât inte relazion finâl dai 16 di Març, al è chel di slargjâ intal 2024 il procès di certificazion ai ospedâi di rêt de ASUFC. Al è un progjet une vore ambiziôs e complès, ma che al à za vût lis adesions convintis dai professioniscj interessâts.
Il Diretôr Gjenerâl, dotôr Caporâl: “Nus è rivade la conferme di une certificazion cetant impuartante che e à daûr un lavôr straordenari de bande de dotore Cedolini e di dut il grup di professioniscj impegnâts: il percors di cure che al ven ufiert aes pazientis al à un nivel pardabon alt, e la certificazion europeane e je la prove”.