"Tuttintondo": gnûf laboratori par fruts dai 12 ai 36 mês e pai lôr gjenitôrs a Osôf
martars 15 di Otubar dal 2024
Iniziative inmaneade dal Servizi Sociâl dai Comuns dal Glemonàs/Cjanâl dal Fier e Valcjanâl
Il Servizi sociâl dai Comuns e la cooperative sociâl Aracon, adun cul Comun di Osôf e il Grup di letôrs volontaris "Amici dei libri" di Glemone, a promovin un laboratori: al tacarà lunis ai 21 di Otubar te Biblioteche comunâl di Osôf. Si fasarà un percors di vot incuintris: cuatri si fasaran il lunis des 10.00 aes 11.30, e cuatri il miercus des 17.15 aes 18.45.
Il laboratori al è intitulât «Tuttintondo»: al propon ai frutins e ai lôr gjenitôrs (o a cui che ju acompagne) zûcs, lavoruts di fâ cu lis manutis, stravâs, dissens, costruzions, ma ancje cjants, nainis, rimis, leturis: il fin al è chel di judâ i piçui a vê plui autonomie e a esplorâ l'ambient, a promovi la relazion tra il frutin e il grant, e fâ zuiâ i piçui tra di lôr. In plui, il laboratori al ufrìs un spazi di dialic e di confront tra adults.
Chi sot si zonte la locandine cu la schede di iscrizion.