Pe prime volte in Europe, fat un traplant di cûr intant che al bat

In Europe, pe prime volte si è traplantât un cûr daûr a bati: pal repart di cardiochirurgjie di Udin al è un travuart cence precedents che al dimostre cetant elevade che e je la competence dai siei operadôrs e la eficience de organizazion cressude intal timp. Cheste esperience di sucès e partìs di lontan: di cuasi cuarante agns incà la Cardiochirurgjie di Udin pai traplants di cûr e je un pont di riferiment nazionâl. Un dai elements che a àn permetût di rivâ a chest risultât - impensabil fin a pôc timp indaûr – al è la pussibilitât pal personâl di organizâ par cont so lis miôr cundizions par podê lavorâ ben.

E je stade cheste la riflession in struc dal assessôr regjonâl pe Salût te conference stampe fate tal ospedâl “Sante Marie de Misericordie di Udin” pe presentazion dal prin traplant fat in Europe di un cûr che al bat, operazion fate lunis ai 20 di Mai tal repart di cardiochirurgjie de Aziende sanitarie universitarie Friûl di Mieç (Asufc). Il pazient al è un om di 69 agns cun cardiomiopatie post ischemiche in fase terminâl, che al jere ricoverât te terapie intensive de cardiochirurgjie e che par vivi al dipendeve di machinaris che a judavin il sanc a circolâ.

Come sclarît te conference, fin vuê si podeve traplantâ un cûr dome dopo vêlu fermât di bati cun proceduris specifichis par po traspuartâlu e implantâlu tal toraç dal gnûf pazient. In cualchi câs, a seconde de distance dal donadôr e des modalitâts dal traspuart, cu lis tecnichis solitis prime di jessi implantât il cûr al podeve restâ fer par un timp variabil, ogni tant ancje fin a 4-5 oris, ma se lu fos stât di plui, e jere la probabilitât che nol rivàs a bati plui.

Traspuartâ il cûr midiant di un sisteme che i permet di continuâ a bati, stant a temperadure normâl, e implantâlu subit cence vê di fermâlu, al permet di ridusii il timp di ischemie, e duncje di un pussibil dam, a dome 35 minûts.

Midiant des tecnologjiis modernis disvilupadis dilunc dai agns intal repart cardiochirurgjic, vuidât vuê dal professôr Igor Vendramin (foto), si vierzin orizonts gnûfs: si podarà conservâ miôr il cûr e aumentâ tal grup dai donadôrs la disponibilitât di orghins utii pai câs “margjinâi”, ven a stâi chei che cumò a son "fûr dal protocol". In cheste maniere, plui pazients a podaran vê un traplant e tancj di lôr che a son in spiete une gnove sperance.

Font regjon F-VJ