Potenziament dal Ospedâl di Tumieç pai zûcs EYOF
joibe 19 di Zenâr dal 2023
Dai 21 ai 28 di Zenâr si davuelzaran i zûcs olimpics invernâi dai zovins EYOF (European Youth Olympic Festival) e une part des garis si fasarà tai centris di schi di: For Davôtri, For Disore, Sapade, Çoncolan, Tarvis, Nevee, Pontêbe.
L'ospedâl di Tumieç, pe sô posizion gjeografiche, al sarà il prin presidi ospedalîr a intervignî par cheste zone di garis.
Al varà di viodi, in part, dai traumis eventuâi dai atletis che a partecipin aes garis, ma ancje des dibisugnis sanitariis dai acompagnadôrs, calcolant un flus diferent a pet de ativitât normâl dal ospedâl: par chest si è predisponude une organizazion dal ospedâl che e tegni cont di chel che al è stât descrit parsore.
Ai 13 di Zenâr il diretôr medic dal presidi ospedalîr di Tumieç, dot. Loris D’Orlando, al à fat un incuintri cun ducj i diretôrs di struture, i coordenadôrs infermieristics e lis posizions organizativis dal ospedâl, par condividi un plan sanitari in linie cul event.
Cui diretôrs e cui coordenadôrs infermieristics al è stât rivalutât il Plan di maxi emergjence dal ospedâl (plan che al previôt un flus eventuâl di pazients fûr de norme organizant la ativazion di 10/20 jets in plui ripartîts tra il Dipartiment chirurgjic e chel medic).
Tal detai, si à incressude la disponibilitât di jets intes “bolis chirurgjichis COVID” par pazients positîfs che a vedin bisugne di un intervent chirurgjic urgjent; a son stâts preparâts 4 jets dedicâts pai pazients dai zûcs intai dipartiments chirurgjics di Chirurgjie gjenerâl e di Ortopedie.
Stant che a son atletis cuntune etât minime di 14 agns, al è stât predisponût 1 jet (dedicât) ancje tal repart di Pediatrie dal Ospedâl di Tumieç.
La part diagnostiche de Radiologjie e je stade potenziade cu la disponibilitât pronte di 2 tecnics par supuartâ lis ativitâts normâls.
Par facilitâ i moviments dentri dal Ospedâl a son stadis zontadis segnaletichis orizontâls coloradis che a mostrin i percors principâi pe sede de diagnostiche par imagjins e pe traumatologjie.
Chest plan si zove de colaborazion di dutis lis figuris sanitariis che a lavorin tal ospedâl.