"Territorio in azione": event dal Tavolo Giovani te sede de Comunitât Culinâr

"Territorio in Azione. Per crescere un adolescente ci vuole un villaggio / Teritori in Azion. Par tirâ sù un adolessent al vûl un paîs", si clame cussì l'event che si è a pene concludût, inmaneât di Tavolo Giovani: un incuintri di pinsîrs e di progjetazions condividûts nassût par meti a disposizion de rêt lis risorsis e lis rispuestis che a son presintis tal teritori Culinâr. L’event al è stât progjetât e volût de Responsabile dai Comuns dal Ambit Teritoriâl Culinâr, Elisa Vidotti, e de Dirigjente scolastiche dal Istitût Statâl di Istruzion Superiôr Vincenzo Manzini di S. Denêl, Carla Cozzi. Tal grup a partecipin il Centri di Salût mentâl, la Struture Minôrs e Famee, la Neuropsichiatrie Infantîl e de Adolessence, il Coordenament Teritoriâl di Ambit tant che rapresentant des Associazions dal teritori, il Centri Risorsa Zovins di Murùs e la Parochie di Sant Michêl Arcagnul di S. Denêl.

La serade, indreçade ai professioniscj e ai operadôrs che in manieris diferentis si ocupin dai adolessents, si è davuelte te sale dai congrès de Comunitât Culinâr; a àn partecipât cuasi un centenâr di personis, tra ospits e relatôrs.

Il fin dal event al è stât chel di fevelâ des risorsis principâls che vuê a son dedicadis ai zovins, dant valôr ae necessitât di une metodologjie integrade e globâl pes dibisugnis dai adolessents, intune logjiche gjenerative di interconession tra Public e Privât.

"Cjapant in considerazion i cambiaments socioeconomics che a àn tocjât ancje la nestre comunitât, ingriviâts de pandemie e de licuiditât de nestre societât, nus à someât di grande impuartance sentâsi ducj ator di une taule par capî cemût che o podìn rispuindi in maniere atuâl e coordenade ai nestris zovins; di fat, vuê – forsit plui di îr –  a cirin rispuestis gnovis, semplicis e coerentis cu lis lôr dibisugnis". Cussì e à introdot la serade Donatella Petruzzi che e je la Coordenadore de Aree Minôrs dal Servizi Sociâl dai Comuns dal Ambit Teritoriâl Culinâr.

Ancje la Scuele e chei altris partecipants interessâts dal teritori a àn condividût chest pinsîr zontant che si àn di dâ rispuestis e servizis simpri inzornâts par fâsi simpri plui dongje ai zovins e aes lôr fameis.

Il president de Comunitât Culinâr che e à ospitât la serade, Luigino Bottoni, al à marcât cetant che il teme dai adolessents al sedi sensibil e atuâl. "O cjapi cheste ocasion par ringraciâ ducj chei che a lavorin tal setôr dai zovins, Istituzions, Privâts, Aziende Sanitarie. Al è un teme pardabon delicât e impuartant pes fameis e al rapresente il nestri impegn pal avignî. O crôt che plui si 'nt fevele, miôr al è, ancje parcè che o vin capît che a son a disposizion rispuestis concretis ai problemis pussibii che a son di frontâ. Par nô al è stât un onôr ospitâ chest event formatîf culì te nestre sede di Colorêt: chest al prove che vuê la Comunitât Culinâr e je calcolade tant che un supuart impuartant pal nestri teritori, par ducj i temis”.

Alberto Fabris, animadôr teritoriâl e facilitadôr dal Coordenament Teritoriâl di Ambit des Associazions de Culinâr, al à zontât: "Lis Associazions in gjenerâl, chês sportivis, lis Pro Loco, lis Parochiis, a son un mont svariât e in moviment, ma ancje preziôs e ben presint sul teritori culinâr. Il rûl tal Tavolo Giovani, a partî de sô nassite e po tal so svilup, al è stât chel di puartâ cheste prospetive ancje come element di cambiament dai schemis. Lis realtâts ditis sore a rispuindin a une schirie di dibisugnis grandis e naturâls che a àn i zovins, come la socializazion, la cognossince dal teritori, la solidarietât. Massime chestis a son un lûc di cressite, ma ancje di impegn e di responsabilitâts. Vuê lis associazions a àn di sostignî dispès i zovins, sedi te dimension educative che in chê relazionâl: chest nus met denant di gnovis sfidis e al scugnî tornâ a pensâ ce rûl che si à te Comunitât".

A àn sierât l'incuintri lis testemoneancis di Giorgia, Riccardo e Sophie, i zovins dal progjet di educazion tra fantats de stesse etât (“peer education”) “Youngle", che a àn contât la impuartance di scoltâ e di valorizâ i zovins di vuê cun servizis inovatîfs, pensâts dai zovins pai zovins intun percors di aministrazion condividude che e smiri a procès di citadinance ative e di benstâ comunitari.

Un gracie a ducj i relatôrs, ai partecipants e ai zovins adults presints in sale: o sin convints che chest al sedi il prin pas bande la costruzion di un vêr paîs che al eduche.