Sperimentazion di farmacs inovatîfs: ASUFC centri di ecelence pe prime Fase

La Aziende sanitarie universitarie Friûl Centrâl (Asufc) e je rivade a un travuart gnûf e impuartant che, pe sô impostazion trasversâl, multidissiplinâr e di gjenar orizontâl, e pe sô valence in cjamp clinic, al rapresente l’avignî. Al costituìs un pas indenant significatîf pe ricercje e duncje pe cure dal pazient: chest, midiant de riduzion grande dai timps di vendite dai gnûfs farmacs inovatîfs, par rispuindi in maniere corete, moderne e madure aes esigjencis di salût dai citadins, e no dome a di chei residents in Friûl-Vignesie Julie.

Chescj a son in struc i concets che al à esprès Riccardo Riccardi, vicegovernadôr cun deleghe ae salût dal Friûl-Vignesie Julie, intervignût vuê a buinore a Udin te presentazion dal gnûf progjet che al è incentrât su lis sperimentazions clinichis dai medisinâi, che par chel la ASUFC e je stade autorizade a tacâ la fase "1". Al incuintri, che si è fat tal ospedâl Sante Marie de Misericordie, a àn partecipât il diretôr gjenerâl de Asufc Denis Caporale, il diretôr dal Centri di coordenament regjonâl pes malatiis raris Maurizio Scarpa, e i professioniscj che par doi agns a àn lavorât a chest progjet che vuê al è pront a inviâsi.

L'esponent de Zonte al à marcât che chest orizont inovatîf di ricercje e di sperimentazion al à di bon il meti a disposizion de comunitât mediche e sientifiche struments gnûfs par curâ lis personis. La Agjenzie taliane dal farmac (Aifa) e à aprovât in maniere uficiâl la ASUFC tant che centri pe sperimentazion di farmacs inovatîfs: chest ricognossiment al evidenzie che in cheste struture ospedaliere a lavorin professioniscj di esperience comprovade e cun capacitâts grandis; oms e feminis che si impegnin a furnî aes personis lis miôrs cundizions di salût.

Riccardi al à graciât ducj chei che a àn partecipât in maniere ative par rivâ a chest travuart; al à rimarcât la impuartance de impostazion multidissiplinâr e trasversâl dal progjet, e che la nestre regjon e à plui ricercjadôrs di chês altris regjons de Italie: 5,5 par mil abitants in F-VJ, a pet di une medie nazionâl di 4. Numars impuartants che la Regjon e vûl incressi, cence fâ mancjâ la sô poie - chest al è il pinsîr dal vicegovernadôr -.

La sperimentazion de fase "1" pai farmacs inovatîfs e dure trê agns e vuê si le fâs pal plui tal forest. In Italie, i centris autorizâts a son un centenâr, ma no lu fasin in forme multidissiplinâr: duncje, ASUFC e je un model e un unicum in dute Italie. Un ricognossiment ancjemò une volte impuartant, come che al à sotlineât l'esponent de Zonte, dopo chel plui resint che al à metût l'ospedâl di Udin tra i miôrs tal mont.

Tal finî il so intervent, Riccardi al à evidenziât ben la dibisugne che si à di doprâ i struments gnûfs cun convinzion par frontâ il moment storic dificil che o sin daûr a vivi tal ambit de salût e de sanitât in dut l'Ocident: si varà di doprâ la inteligjence artificiâl, la telemedisine, e fâ un percors di integrazion sociosanitarie; si varà di partî di un invistiment grant sul capitâl uman, passant par une alfabetizazion tecnologjiche che e je necessarie sedi pal personâl sanitari che pai utents, metint in rêt dutis lis cognossincis.

Il Diretôr Gjenerâl ASUFC, Denis Caporale: “Al è un pas impuartant pe nestre Aziende che in curt al cjaparà dentri ancje altris specialitâts par permeti a ASUFC di deventâ une des pocjis struturis multidissiplinârs di “fase I” là che si podaran studiâ farmacs une vore avanzâts. Cun cheste autorizazion si da inmò plui valôr al lavôr di ricercje che si fâs dentri de Aziende, testemoneant ancjemò une volte la integrazion tra Aziende ospedaliere e universitât: e je propit cheste sinergjie cussì strente e costante tra la istituzion ospedaliere e chê universitarie che e permet di otignî risultâts cussì impuartants”.

Font Regjon F-VJ