Molâ di fumâ: nol è mai masse tart
martars 27 di Avost dal 2024
Viertis lis iscrizions par un cors gnûf tal Centri di Prevenzion e Tratament dal Tabagjisim.
Il fum dal spagnolet al è tra i fatôrs di pericul principâi tal mont pal svilup de plui part des malatiis cronichis no trasmissibilis: si calcole che in Italie almancul une persone su cuatri e fumi in maniere abituâl. Al è ben ricuardâsi che lis oris plui dificilis a son lis primis 24 dopo dal ultin spagnolet e che la astinence massime si le à tai prins cuatri dîs.
Il centri di Prevenzion e Tratament dal Tabagjisim de ASUFC al inmanee percors par molâ di fumâ: si varà il supuart e il jutori che al covente par dismeti cun facilitât la abitudin di fumâ e soredut par mantignî la astinence tal timp.
Il cors “molâ di fumâ” si davuelzarà in 10 incuintris serâi, des 19.30 aes 21.30, dividûts su trê setemanis, te sede dal Dipartiment des Dipendencis “Basse Furlane” in vie Molin, 21 a Palme.
E je daûr a tacâ la gnove edizion cui 9 di Setembar: par frecuentâ il cors, che al à un numar limitât di partecipants, si à di paiâ un ticket di 36 euros.
Par iscrizions e informazions si pues clamâ chescj numars:
- 0432 921914
- 0432806635
- 0432806649