NO SCJASSÂLU! Zornadis Nazionâls di prevenzion de Sindrome dal Frutin Scjassât
Sabide ai 11 e domenie ai 12 di Avrîl Ancje la Pediatrie di Tisane e aderìs ae campagne
La Pediatrie dal Ospedâl di Tisane e aderìs ancje chest an ae impuartante campagne nazionâl clamade "NO SCJASSÂLU!", iniziative di prevenzion de Sindrome dal Frutin Scjassât (par inglês Shaken Baby Syndrome), promovude di Terre des Hommes e de SIMEUP (Societât Taliane di Medisine di Emergjence e Urgjence Pediatriche) in colaborazion cu la SIP (Societât Taliane di Pediatrie) che e cjape dentri plui di 150 citâts in dute Italie.
A Tisane il program al scomence sabide ai 11 di Avrîl tal infopoint dongje de jentrade dal Ospedâl, là che, des 11 aes 13, i specialiscj pediatris dal repart si metaran a disposizion par dâ informazions su cheste tematiche. Po dopo, par dute la setemane, la iniziative e larà indenant li de Pediatrie par sensibilizâ i gjenitôrs e chei che a viodin di un neonât o di un frutin sui pericui dal scjassament.
L'obietîf de iniziative al è chel di prevignî la Sindrome dal Frutin Scjassât, mostrant lis modalitâts coretis par protezi i fruts di chest pericul, partint de convinzion che spes no si cognossin lis consecuencis potenziâls dal scjassâ un frut, ancje par pôcs seconts, spes par vie che no si rive a consolâlu cuant che al vai.
Di fat, par solit e je une vaiude sprolungjade dal frutin (0-2 agns) che e scjadene une pierdite di control momentanie in chei che a viodin di lui e che e puarte a scjassâlu par fâlu smeti, cence la volontât o la cussience di fâ un dam.
Cul jutori di opuscui, si partirà di informazions su lis carateristichis de vaiude dai prins mês di vite, che e à une piche fisiologjiche des 2 setemanis ai 5-6 mês: in chest periodi a puedin verificâsi crisis dulà che il frutin al vai in maniere inconsolabile, che cualchi volte a puedin durâ ancje oris, spes di sere.
Chestis crisis a rapresentin une fase evolutive normâl e si ridusin in mût spontani cul timp, par regredî tai mês di dopo.
Dut câs, chest periodi al pues provocâ tai gjenitôrs o in cui che al viôt dal frutin une preocupazion fuarte, stress, strachece e cualchi volte frustrazion fin ae esasperazion, elements che a puedin scjadenâ, si ben che cence volê, la reazion di scjassâ il frutin.
Cul jutori di un manichin, si spiegarà parcè che al è cussì pericolôs scjassâ une neonât o un frutin, stant che a son vulnerabii in maniere particolâr: cheste azion, ancje se si le fâs par pôcs seconts, e pues causâ emoragjiis oculârs e cerebrâls cun dams ancje grâfs e permanents e fin ae muart intun câs su 4.
I specialiscj pediatrics a puartaran la atenzion sul fat che un frut nol à di jessi scjassât mai, no impuarte la etât: se il vaî dal frut al devente insostignibil e si à fat dut ce che si podeve par cuietâlu, verificant il so stât di salût e lis sôs esigjencis primariis, se si ves di vê la sensazion di jessi sul pont di pierdi il control, al è impuartant meti il frut tal sigûr, par esempli te scune, domandâ jutori e slontanâsi fin cuant che no si è tornâts in control des propriis emozions. No scjassâlu mai! Se al è pussibil, clamâ cualchidun a judâ, un familiâr o un amì che al podedi dâ un supuart ancje dome momentani. Chest al pues fâ la diference te vite di un frut.
Tai infopoint a saran dâts fûr materiâi informatîfs e tant che simbul balutis antistress colôr naranç, che al caraterize cheste campagne, ricuardant la impuartance di fermâsi e di mantignî il control tai moments di dificoltât plui grande.
La iniziative nazionâl che e smire a sensibilizâ su cheste tematiche delicade e a prevignî lis consecuencis dramatichis di compuartaments no cussients ma pericolôs. Cheste edizion dal 2026 e à otignût ancje il ricognossiment une vore impuartant de Medaie dal President de Republiche.
Par aprofondî il teme, si puedin visitâ chescj leams: