Intervents di domiciliaritât lizere e promozion de rêt di volontariât locâl: la colaborazion tra il Servizi Sociâl Culinâr e il MoVI

Cul 1ⁿ di Otubar dal 2021, il Servizi Sociâl dai Comuns dal Ambit Teritoriâl Culinâr al à ative une convenzion cul Moviment dal Volontariât Talian (MoVI) par garantî intervents di domiciliaritât lizere e di traspuart sociâl a pro di citadins in cundizion di fragjilitât, autonomie ridote e cun pericul di isolament sociâl.

Cheste progjetualitât e nas daûr dal mandât de Assemblee dai Sindics che, cjalâts i bisugns dal teritori, la incressite de etât medie de popolazion e la framentazion dal tiessût sociâl, e à pensât di organizâ un servizi sistemic, struturât e sostignibil dant continuitât e poie ai percors za nassûts in maniere spontanie intai singui comuns dal Friûl Culinâr. 

I obietîfs dal progjet a son chei di promovi e sostignî il disvilup di comunitâts ospitâls e solidariis, cu la metude in rêt des tantis risorsis presintis intal teritori, judâ la nassite e il disvilup di grups gnûfs di volontaris e ancje creâ une rêt tra i grups che a esistin za.

In chest senari il MoVI al sigure une centrâl uniche e permanente di racuelte e di distribuzion des domandis e ancje la organizazion des rispuestis, al ative percors formatîfs e di poie ai volontaris e al garantìs la campagne di comunicazion a supuart des associazions. Il progjet cun di plui, midiant des risorsis metudis a disposizion dal Ambit, al da ai varis grups doi mieçs furnîts pal traspuart di personis in carocine, che a van a zontâsi a chei che il MoVI al à za in dotazion e che a vignaran doprâts in mût condividût di ducj i grups di volontaris.

Dilunc dal 2022 ai volontaris dal MoVI za atîfs intai comuns di San Denêl, Dignan e Cosean, si son metûts dongje i grups di Feagne, Murùs, Trep, Flaiban e Forgjarie: i volontaris a àn fat plui di 30.000 km e a àn judât 150 personis, par un totâl di 909 jessudis. Lis domandis di intervent rivadis al Servizi Sociâl dai Comuns dal Ambit Teritoriâl “Culinâr” a tocjin prin di dut i acompagnaments a visitis medichis, terapiis ospedalieris, acuist di farmacs e il supuart di prossimitât pal acompagnament par spesis, comissions e jutori domestic.

In curt al vignarà inviât un grup gnûf a Maian, dulà che, martars ai 28 di Fevrâr aes 18.30 li de sale dal Consei dal Comun, e vignarà fate une serade pe popolazion, là che al vignarà presentât il progjet e si cjaparan sù lis adesions dai gnûfs volontaris.

Vie pal 2023 al è previodût l'inviament dal stes percors intai comuns di Rivis Darcjan, Ruvigne e Colorêt di Montalban.

“L’obietîf ambiziôs dal progjet – e comente la Responsabile dal Servizi Sociâl dotore Elisa Vidotti - al è chel di rivâ dentri dal 2024 ae stabilizazion di un grup di volontaris atîf in ogni Comun dal Ambit Culinâr e ancje consolidâ la rêt di colaborazion e di scambi tra dutis lis realtâts che si impegnin par judâ cui che al fâs plui fadie. Sostignî lis personis plui fragjilis o in situazions di dificoltât al contribuìs in maniere significative ae coesion e ae cressite des nestris comunitâts e al miorament de cualitât de vite di ducj. Par rivâ a vinci cheste sfide il contribût di ogni citadin al è indispensabil e preziôs”.

Par plui informazions: Cjase dal Volontariât – vie Udin, 4 San Denêl – segreteria@movi.fvg.it – 0432 1451545.