Il Servizi Sociâl de Cjargne al invie la schirie di incuintris "Allena-Mente"
Al scomence cui 18 di Fevrâr tal centri "Podìn insieme" un percors di potenziament cognitîf par personis cun plui di 70 agns
Al vie "Allena-Mente", une schirie di incuintris pes personis cun plui di 70 agns, dedicâts ae promozion dal benstâ, de cualitât de vite e dal invecjament atîf. La iniziative e je promovude dal Servizi Sociâl dai Comuns dal ambit teritoriâl de Cjargne in colaborazion cul Comun di Tumieç e cul jutori de Cooperative Itaca.
Il prin apontament al è pai 18 di Fevrâr aes 15.00, te sede dal centri di agregazion "Podìn Insieme" di vie Oberdan a Tumieç e al sarà seguît di altris trê incuintris te stesse sede, fissâts pai miercus di dopo, des 15.00 aes 17.00: dut câs, tai dîs seguitîfs a saran inmaneâts altris incuintris in altris localitâts de Cjargne.
Il percors al sarà coordenât de psicolighe Elena Monasso: "Allena-mente - e spieghe la professioniste - al è un percors di potenziament cognitîf indreçât a personis cun plui di 70 agns e al nas cul obietîf di promovi il il benstâ e di sostignî la cualitât de vite te fase dal invecjament. In linie cu lis indicazions de Organizazion Mondiâl de Sanitât (OMS), il program al jentre intune prospetive di prevenzion e di invecjament atîf, ricognossint la impuartance fondamentâl des funzions cognitivis tal mantigniment de autonomie e de partecipazion ae vite cuotidiane".
Il percors al ufrirà un jutori al funzionament cognitîf midiant di ativitâts struturadis e smiradis par stimolâ la memorie, la atenzion, il lengaç, lis funzions esecutivis e la capacitât di resonament. I riferiments teorics e metodologjics dal percors a son leâts in particolâr al "Training pal invecjament atîf" formulât di De Beni, Zavagnin, Borella (2020) e il portfoli sull’Empowerment cognitîf dal "Servizi e Laboratori di Psicologjie dal invecjament", atîf te Facoltât di Psicologjie de Universitât di Padue.
Il program proponût al à une finalitât preventive, cul obietîf di rinfuarçâ lis risorsis cognitivis e di ralentâ i cambiaments naturâi leâts ae etât.
Il Servizi Sociâl de Cjargne al fâs savê che par partecipâ ai incuintris si pues notâsi clamant il numar dal animadôr dal servizi Andrea Dorni al 3471173364.