Spot di sensibilizazion cuintri de violence sui operadôrs

Inte suaze dal Progjet di promozion de culture de sigurece sul puest di lavôr e tal ambient scolastic e coordenât dal personâl che al fâs part de SOC Prevenzion e Sigurece tai Ambients di Lavôr, ancje tal an scolastic 2024-25 al è stât metût adun un spot su la sigurece, par cure dai students de classe IV Odontotecnics dal Istitût G. Ceconi cul jutori di professioniscj dal setôr cinematografic.

Il teme tratât al è une vore atuâl, stant che chest fenomen al cres in maniere preocupante ancje te nestre regjon. L'INAIL tal 2022 al à regjistrât 2.243 câs di infortuni (plui di 6 ogni dì) par vie di violencis, agressions e menacis cuintri dai operadôrs sanitaris, soredut feminis (70%). A chescj numars si zontin lis 16.000 segnalazions di agressions verbâls e di dams cuintri dai bens e des struturis, ricevudis dal osservatori nazionâl su la sigurece dai professioniscj sanitaris e sociosanitariis metût adun dal Ministeri de Salût.

Lis ativitâts in aule propedeutichis ae realizazion dal spot, puartadis indenant di Tecnics de Prevenzion dal Dipartiment di Prevenzion e di une Psicolighe dal Servizi di Prevenzion e Protezion de ASUFC, a àn aprofondît il risi des violencis cuintri dai operadôrs sanitaris e sensibilizât i students su la tematiche favorint la culture de sigurece, intindude tant che patrimoni comun di lavoradôrs e citadins, indispensabil par tutelâ la salût di ducj.