Screening regjonâl pal HCV (epatite C): e tache la gnove campagne 2024
miercus 3 di Avrîl dal 2024
A son invidâts a partecipâ i residents in F-VJ che a àn 35-55 agns. Il test al è gratis e si pues prenotâlu tal Call Center regjonâl, tai CUP de ASUFC o tes farmaciis abilitadis.
E torne a tacâ la campagne screening pal HCV – Epatite C pai residents dal Friûl-Vignesie Julie nassûts tra il 1969 e il 1989 che no lu àn za fat l’an passât. L’esam pal screening de epatite C (HCV) al è gratis e si pues prenotâlu tal Call Center regjonâl, tai CUP de ASUFC o tes farmaciis abilitadis.
Ce ise?
La epatite C e je une inflamazion dal fiât causade dal virus HCV (Hepatis C Virus): dispès no si àn segnâi, ma si puedin vê dams impuartants fintremai di ruvinâ il funzionament dal fiât o di fâ vignî cirrosi o tumôrs.
Dut câs, la epatite C si pues curâle: a son medisinis che a rivin a disvinidrî il virus fin al 95%, cun efiets colaterâi lizêrs. Par chest al è impuartant fâ l’esam: scuvierzi daurman la presince dal virus HCV al permet di agjî subit e in maniere valide par che la inflamazion dal fiât no vadi in piês.
Cemût aderî?
Ducj i citadins cu lis carateristichis che o vin descritis parsore, vie pal an a ricevaran une letare di invît a partecipâ, e a prenotaran il prelêf intun dai centris aziendâi. Par notâsi si pues contatâ i sportei CUP di ASUFC, al Call Center (tel. 0434 223522) e aes farmaciis abilitadis.
E se no ai ricevude ancjemò la letare?
Il citadin che al è interessât al screening, o sedi cu lis carateristichis descritis, al pues fâ il test ancje cence la letare di invît: cuant che al va tes sedis de ASUFC, par altris prenotazions o pûr par prelêfs, esams, visitis o altris prestazions, al baste che al domandi se al pues fâ daurman ancje il prelêf par chest screening.
Dulà si viodial il risultât dal test?
I citadins a podaran viodi il risultât dal esam tal Fassicul Sanitari Eletronic.
Se e ven cjatade la infezion di epatite C (HCV), ce sucedial?
In câs di positivitât dal screening, si vignarà contatâts par fâ une visite intun centri specialistic di riferiment, par altris aprofondiments e par inviâ la terapie.
Ce costial?
Nuie! Il screening al è gratis.