Screening oncologjics in ASUFC: informazions e numars di telefon

martars 21 di Fevrâr dal 2023

Screenings pes feminis

Lis feminis residentis in Friûl-Vignesie Julie che a àn tra i 45 e i 69 agns (estension fin a 74 agns se a àn dade adesion ai invîts precedents) a son clamadis dal Call center regjonâl cul numar 040 0647837 par concuardâ un apontament li di une des localitâts di competence de Unitât mobile.

Pap test e HPV test (prevenzion e diagnosi precoce dai tumôrs dal cuel dal utar)

Il Call center regjonâl cul numar 040 0647837 al telefone aes feminis fra i 25 e i 64 agns par concuardâ une date e un lûc dulà sometisi ae prove che e sarà il Pap test pes feminis tra i 25 e i 29 agns o il HPV DNA test pes feminis dai 30 ai 64 agns.

Cuant che si ven clamâts par telefon si pues sielzi la date e il lûc dulà lâ par sometisi al screening.

Telefonant al numar 800 000 400 si pues domandâ di cambiâ la date di un dai doi screenings pes feminis, e cjatâ une plui juste daûr de proprie disponibilitât.

Se si cjate il numar 040 0647837 sul telefon al vûl dî che si è stadis clamadis par fissâ un apontament par un dai screening pes feminis.

Screening dal colon ret

SANC PLATÂT INTAI ESCREMENTS (PREVENZION E DIAGNOSI PRECOCE DAI TUMÔRS DAL COLON RET)

L'invît al ven mandât a cjase cu la pueste ai residents regjonâi tra i 50 e i 69 agns (estension fin a 74 agns se a àn dade adesion ai invîts precedents).

Par vê informazions o intal câs là che la letare di invît no sedi stade recapitade, l'utent al pues contatâ lis Struturis di Screenings Oncologjichis ASUFC.