Screening odontoiatric gratuit pai fruts des scuelis primariis: al è daûr a tacâ il progjet dal distret sociosanitari de Cjargne
martars 1 di Otubar dal 2024
Si scomence a Comelians, lunis ai 30 di Setembar
Al è tacât l’an scolastic 2024/25 e il Distret Sociosanitari de Cjargne, in colaborazion cui Istitûts Comprensîfs dal teritori, al met in vore un progjet gratuit di screening odontoiatric pe salût orâl dai fruts des scuelis primariis.
Il progjet al cjape dentri i fruts di sîs agns che a son iscrits tes classis primis e al previôt l’acès tes scuelis de odontoiatrie aziendâl, cu la presince di personâl assistent, par individuâ in anticip la presince o mancul di carie, maloclusions o altris patologjiis.
Pai câs che a varan bisugne di jessi curâts, il progjet al permet di tratâju tal ambulatori dentistic intal ospedâl di Tumieç, gjestît de stesse dotore che e à fat la visite.
A ducj i fruts che a fasaran la visite, ur vignarà dât il refert cui risultâts e, tal câs che a coventin altris controi, ancje la documentazion cu lis informazions utilis par podê zovâsi dal tratament tal ambulatori de Aziende Sanitarie.
Ai Istitûts Comprensîfs che vie pal an a parteciparan a cheste iniziative ur vignarà dade la modulistiche di mandâ ai gjenitôrs dai fruts par ducj i adempiments burocratics (informative, espression dal consens, e v.i.).
Il prin apontament al sarà lunis ai 30 di Setembar tes scuelis primariis dal Istitût Comprensîf di Comelians.
La Diretore dal Distret, dotore Silvia Mentil: “O inviìn chest progjet in colaborazion strente cui Istitûts Comprensîfs cun chê di facilitâ un percors assistenziâl lant a individuâ chês che a podaressin sei criticitâts prime che a deventin câs plui delicâts: la colaborazion cun chei altris ents e je fondamentâl e si augurìn di slargjâ cheste rêt a dutis lis scuelis che le calcolaran impuartante. Nô o sin ca, presints, a disposizion pe salût dai fruts”.