Screening mamografic: il calendari de unitât mobile al è disponibil tes sedis de ASUFC

Cui 5 di Avost dal 2024 al tacarà il secont semestri di screening mamografic pes feminis che a son residentis tal teritori de ASUFC.

I esams di screening mamografic si fasin intune Unitât mobile, cun chê di puartâ la prevenzion dongje des personis, fûr dal ambient dal ospedâl: i referts des mamografiis realizadis te Unitât mobile a son elaborâts di siet senolighis di screening de Aziende Sanitarie dal Friûl Centrâl. Si fâs simpri un control dopli dai risultâts e, se al covente, un arbitrât tal câs che no si concuardi sul esit finâl. Cun chest procediment si à di spietâ un pôc par vê il refert, ma si garantìs il grât massim di cualitât a nivel european.

Un program organizât di screening come chel de Aziende al à ancje un altri vantaç: al rapresente un percors complet di cjapade in caric dai câs di no negativitât, partint dal fat che ducj i câs li che al covente fat un aprofondiment a son, daûr des regulis dal program regjonâl, cjapâts in caric e analizâts tal detai des senolighis che a fasin il screening intai ospedâi di Tisane, San Denêl, Tumieç e Udin. Dutis a àn superât lis verifichis basadis su rigorôs nivei di cualitât europeane (Eusoma), par sigurâ une cjapade in caric eficiente e omogjenie in dut il teritori de Aziende.

Lis feminis che a fasin il percors di aprofondiment a son acompagnadis di personâl sanitari formât e dedicât, che al opere tes sedis dal Dipartiment di Prevenzion ASUFC di Glemone, Tisane e Udin.

La mamografie, che si racomande di fâ ogni doi agns pes feminis tra i 45 e i 69 agns, e je l’esam plui zovevul pe diagnosi anticipade dai tumôrs dal pet, parcè che e permet di individuâju inte fase iniziâl.

Par fâ l’esam, che al è gratuit inte fasse di etât racomandade e fin ai 74 agns tal câs di une adesion precedente, al baste lâ li di une Unitât mobile cu la letare di invît (no covente la impegnative).

Tal câs di disservizis dal sisteme postâl o par vê plui informazions, si pues contatâ la segretarie screening de Aziende sanitarie par email scrivint a screening@asufc.sanita.fvg.it o clamant il numar 0432 553994.

La Unitât mobile di screening mamografic e restarà tes sedis lant daûr dal calendari chi sot, par po tornâ in maniere periodiche: in ogni câs, par rispuindi aes necessitâts des pazientis, l’esam si podarà programâ ancje intune date sucessive in altris sedis tocjadis de Unitât mobile.

Calendari