Screening mamografic: publicât il calendari dal secont semestri 2026

Di Lui a Dicembar la Unitât Mobile de ASUFC e sarà in vore in cutuardis sedis dal teritori par meti a disposizion la mamografie di screening dongje cjase.

Tal secont semestri a son stâts programâts plui di 27.000 apontaments, che a jentrin intune programazion di cirche 55.000 mamografiis ad an dadis fûr sore nuie de ASUFC aes feminis che a 'nd àn dirit.

Cemût partecipâ

La mamografie di screening e je sore nuie e, in conformitât cu lis Liniis vuide, e je indreçade aes feminis tra i 45 e i 69 agns (e fin ai 74 agns par cui che e a bielzà partecipât al program).

Al baste presentâsi al apontament cu la letare di invît rivade a cjase.

Se a coventin altris esams a saran organizâts de ASUFC, cence coscj e cence bisugne de impegnative dal Miedi di Medisine Gjenerâl.

Se la date proponude no va ben, si pues cambiâle sielzint une altre sede o une altre disponibilitât.

Par informazions tal câs che nol fos rivât l'invît o par fissâ un altri apontament:

• Direzion di pueste: screening@asufc.sanita.fvg.it
• Telefon: 0432.553290 dal lunis al vinars des 9.00 aes 13.00

Calendari

La Unitât Mobile si fermarà tes sedis programadis tal calendari e e tornarà in mût periodic. Se la date proponude no va ben, si pues fissâ un altri apontament, ancje intune altre sede plui comude.

Un percors sigûr e di cualitât

Ogni mamografie e ven valutade in mût indipendent di dôs des dîs radiolighis ASUFC che si ocupin dal screening mamografic. Lis professionistis a operin daûr di nivei di cualitât rigorôs e a partecipin a programs di formazion e di verifiche continuâts.

Se a coventin altris esams, la ASUFC e garantìs un percors svelt, organizât e personalizât tai presidis ospedalîrs di Tisane-Palme, San Denêl-Tumieç e Udin.

Dutis lis sedis a fasin part de Breast Unit ASUFC, increditade di EUSOMA, il riferiment principâl in Europe pe cualitât des curis dal tumôr dal sen.

I vantaçs dal screening mamografic

Il screening mamografic te plui part dai câs al permet di rilevâ i tumôrs in maniere une vore anticipade. Cuant che il tumôr dal sen al ven cjatât prime a cressin une vore lis pussibilitâts di curâsi e di vuarî dal dut. Cun di plui, la diagnosi precoce in tancj câs e permet trataments conservatîfs, mancul invasîfs, che a eliminin dome il tiessût malât, cence gjavâ vie dut il sen ni i ganglis linfatics de lesine. Ancje lis terapiis sistemichis (come la chemioterapie) dispès no coventin o a son mancul drastichis. Intervents no invasîfs e terapiis sistemichis plui lizeris a compuartin mancul efiets colaterâi e a permetin di tornâ prime aes ativitâts de vite di ogni dì. Tal complès, duncje, il screening mamografic al è un imprest fondamentâl di prevenzion, che al pues miorâ la prognosi in mût significatîf, sbassâ l'impat dai trataments e tutelâ la cualitât di vite des feminis.

I limits dal screening mamografic: ce che al è impuartant di savê

La mamografie e je l'esam plui valit che vuê o vin a disposizion par cjatâ il tumôr dal sen in mût anticipât, ma no je infalibile. In cualchi câs râr la malatie e pues svilupâsi o manifestâsi tal interval tra doi controi programâts.

Par chest al è impuartant che ogni femine, ancje se e à fat di pôc une mamografie di screening cun risultât regolâr, e stedi simpri atente a eventuâi cambiaments dal sen (come nodui, pierditis di licuit o di sanc dal cjavidiel, retrazion dal cjavidiel, sglonfums sot de lesine).

Se a comparissin chescj sintoms, cence spietâ il prossim invît, si à di contatâ daurman la Centrâl Operative screening (screening@asufc.sanita.fvg.it – 0432 553290, dal lunis al vinars 9:00–13:00).

Lis operadoris de ASUFC a valutaran la situazion adun cu la femine e, cuant che a coventin, a organizaran cun rapiditât i aprofondiments plui adats. L'obietîf al è di garantî une rispueste pronte e di acompagnâ la femine tal percors, cence lassâ che i dubis o i timps di spiete a fasedin intardâ i aciertaments che a coventin.