Une spiete a misure di frut in Radiologjie a Udin
La donazion di ABIO e i progjets ilustrâts pai piçui pazients
Frontâ un esam medic al pues causionâ ansie e pôre, soretut a un frut. Par chest motîf, rindi i reparts dal ospedâl plui a misure dai piçui pazients al è un pas fondamentâl viers de vere umanizazion des curis. Un progjet resint al sta dimostrant cemût che la creativitât e la empatie dal personâl sanitari a puedin trasformâ cheste esperience in maniere radicâl.
Joibe di matine ai 19 di Març e je stade fate une piçule cerimonie par ringraciâ la Associazion ABIO ("Associazione per il Bambino in Ospedale") par vê donât une television gnove, che e à permetût di miorâ in maniere sensibile il timp di spiete dai fruts prime dai esams, in gracie dai progjets ilustrâts di Marisa Nava e Laura Tonello, dôs tecnichis di radiologjie che a lavorin in altris struturis.
Di fat, su chest schermi a vegnin trasmetûts videos une vore speciâi, ideâts par spiegâ il mont de diagnostiche par imagjins intun mût che al calme i fruts e ju jude a capî.
Marisa e Laura a àn scrit e ilustrât libris par fruts su la tematiche de radiologjie, contant lis aventuris di personaçs che a àn di fâ esams come la radiografie, la ortopantomografie, la ecografie e la risonance magnetiche. Te fase seguitive, lis imagjins tiradis fûr des pagjinis di chescj libris a son stadis animadis e trasformadis in videos di mostrâ ai piçui pazients in sale di spiete.
Chest svicinament naratîf e visîf al permet ai fruts di familiarizâsi cun machinaris complès e rumorôs, ridusint il stress e favorint la colaborazion intant dal esam.
Il progjet al è destinât a cressi: la idee pal avignî e je chê di creâ altris videos che a documentin dut il percors dal pazient pediatric te struture dal ospedâl. L'obietîf al sarà chel di dâ al frut un acompagnament virtuâl di cuant che al rive al pront socôrs pediatric, vuidantlu un pas ae volte fin ae Radiologjie par fâ i esams.
Presints ae cerimonie il diretôr dal Dipartiment Diagnostic, dr. Sponza, la diretore de Radiologjie di Urgjence, dot.e Vasciaveo, la dot.e Lesa, diretore mediche dal Sante Marie de Misericordie, e la dot.e Fadone, vêr motôr de iniziative, insiemi cui rapresentants de associazion.