Gjestion des malatiis cronichis dal intestin: incuintri viert a ducj sabide ai 12 di Avrîl a Udin
miercus 9 di Avrîl dal 2025
Sabide ai 12 di Avrîl incuintri tra miedis e pazients su la gjestion multidissiplinâr des Malatiis Inflamatoris Cronichis dal Intestin
Sabide ai 12 di Avrîl dal 2025, des 9:00 aes 12:00 a Udin, tal Dipartiment di prevenzion in vie Chiusaforte n. 2, al sarà un incuintri tra miedis e pazients dedicât ae gjestion des Malatiis Inflamatoris Cronichis dal Intestin (MICI).
Cheste iniziative e je une oportunitât preziose pal dialic tra professioniscj de salût e pazients, cul obietîf di analizâ lis sfidis e lis miôr pratichis di cure e di gjestion di chestis malatiis.
L’incuintri al è sore nuie e viert a ducj, e al è promovût de Associazion AMICI ITALIA sezion F-VJ in colaborazion cu la Struture di Gastroenterologjie direte de dotore Debora Berretti e cu la Struture MICI direte dal dotôr Marco Marino dal Presidi Ospedalîr S. Marie de Misericordie di Udin.
L’event al vûl esplicâ il model inovadôr de Gastroenterologjie di Udin, che al cumbine cliniche e ricercje par ufrî une assistence gnove, personalizade e di cualitât alte. La scuadre multidissiplinâr dal Centri, che e à dentri specialiscj gastroenterolics, pediatris, nutrizioniscj, chirurcs, reumatolics, psicolighe, dietistis e infermîrs “dedicâts” e lavore in mût sinergjic par meti adun une rêt di supuart pai pazients.
Tal incuintri si daran nozions clinichis e un inzornament sientific su lis malatiis inflamatoris cronichis dal intestin e su la sostignibilitât des gnovis terapiis. “La gjestion multidissiplinâr des Malatiis Inflamatoris Cronichis Intestinâls e je aromai un principi fondamentâl che nol pues mancjâ sedi cuant che al scomence il percors di cure sedi tai moments des decisions cruciâls, tant che il tratament tal moment de diagnosi, de remission e/o dal riacutizâsi de malatie o il passaç de etât pediatriche a chê adulte” al aferme il dot. Marino.
Cheste ativitât e à l'obietîf di judâ i pazients a capî pal miôr la lôr malatie, a gjestî i siei sintoms e a frontâ i percors di diagnosi, di terapie e di prevenzion des complicazions, in plui e je une ocasion impuartante par sburtâ a condividi lis esperiencis e par rinfuarcî la colaborazion tra pazients e professioniscj sanitaris.