Animâ l’Istât: formazion pai centris estîfs 2023
joibe 18 di Mai dal 2023
Iscrizions dentri di lunis ai 22 di Mai
Il Servizi sociâl dai Comuns dal ambit teritoriâl de Cjargne al propon une piçule formazion, gratuite, par animadôrs e assistents animadôrs (dai 14 agns finîts) impegnâts tai Centris estîfs de Cjargne.
La formazion, fate de dotore Gaia Pecile e de educadore dal Servizi sociâl dai Comuns de Cjargne, la dotore Nicole Straulino, e previôt doi incuintris di cuatri oris ognidun che si fasaran:
- vinars ai 26 di Mai dal 2023, des 14.00 aes 18.00
- sabide ai 27 di Mai dal 2023 des 14.00 aes 18.00
li de Base Scout di Çurçuvint (Strade statâl 465 a Çurçuvint).
Ancje chest an, di fat, la Base Scout di Çurçuvint AGESCI FVG e à dade la sô disponibilitât preziose e la sô colaborazion par dâ l’acet te struture.
La propueste formative dal Servizi sociâl pai animadôrs e i assistents animadôrs di Centris estîfs e partìs de convinzion che il Centri estîf al sedi un spazi e un timp une vore educatîf, no dome ricreatîf. Chest, al domande une progjetazion e une programazion specifiche de bande di un grup di animadôrs cussients dal lôr rûl, part di une comunitât che e eduche, e atents aes dibisugnis dai fruts e dai fantats che a son cun lôr, bogns di interagjî su la fonde di une intenzionalitât educative, lontane dal spontanisim, e che e supuarte une ricercje di sens continue te dimension relazionâl.
La metodologjie formative e sarà interative, cjapant dentri in maniere ative i partecipants cu lis condutoris e chei altris corsiscj, tacant cu la esperience personâl, favorint la dimension indutive e la derivazion dai concets de esperience pratiche e de riflession su cheste, praticant la auto riflessivitât tant che imprest di analisi dal propri operât e di un miorament costant.
Tal detai, tai limits dal timp a disposizion e cul just aprofondiment, te prime zornade si frontarà la tematiche de colocazion dal rûl dal animadôr e dal assistent animadôr, la impuartance dal lavôr in scuadre, la progjetazion e la programazion di un Centri estîf. Te seconde zornade, invezit, il focus al sarà sul frut/fantat che al cjape part al Centri estîf, sul osservâ e sul scoltâ lis sôs carateristichis, lis sôs necessitâts, i siei limits e lis sôs risorsis, su la relazion educative e su la gjestion dai compuartaments dificii/inadeguâts/problematics e la conession tra chescj e la emotivitât dai fruts e dai fantats (e dai animadôrs).
Pes iscrizions e/o par domandâ informazions si pues contatâ la educadore dal Servizi sociâl de Cjargne, dotore Nicole Straulino, al numar 3312674511, mandant la Schede di iscrizion ca sot, ancje vie WhatsApp, dentri di lunis ai 22 di Mai dal 2023.
Si darà la precedence a chei che a garantiran di partecipâ a ducj i doi dopomisdîs di formazion, che a son pensâts tant che un percors unic. Tal câs che lis domandis di iscrizion a vessin di superâ i puescj disponibii, il Servizi si risierve di dâ la precedence a chei che a vegnin di Parochiis, Ents o OdV che no rivin a garantî la formazion in maniere autonome. Cun di plui, il Servizi si risierve la pussibilitât di ecuilibrâ lis presincis di mût di dâ la pussibilitât a varis Centris estîfs di acedi ae formazion.
