Risi di esposizion a calôr: il plan di prevenzion di ASUFC

Inte suaze des ativitâts di assistence e vigjilance programadis pal 2026 des struturis di Prevenzion e Sigurece tai Ambients di Lavôr des Aziendis Sanitariis, lis liniis di lavôr regjonâls a previodin di pandi, midiant des associazions di categorie dai setôrs plui esponûts al risi di stress termic, des Liniis di indreçament aprovadis de Conference des Regjons pe protezion dai lavoradôrs dal calôr e de radiazion solâr e il control dal orghin di vigjilance de aplicazion corete di chestis Liniis tes impresis edîls e agriculis.

A chest proposit, in colaborazion cun ANCE UDIN e EBAF F-VJ, la SOC PSAL di ASU Friûl Centrâl e à organizât, tal ordin ai 30 di Març a Udin e ai 8 di Avrîl tal Auditorium dal Istitût Agrari Sabbatini di Puçui, doi events informatîfs pes impresis, i professioniscj, lis associazions datoriâls e sindacâls, su lis metodichis di valutazion dal risi di calôr, su lis misuris di prevenzion e su lis consecuencis pe salût e pe sigurece dai lavoradôrs. I relatôrs a àn evidenziât cemût che il stress termic nol sedi dome cause di infortunis direts (come il colp di calôr), ma ancje cemût che al pues aumentâ i infortunis in maniere indirete, par vie de disidratazion e des consecuentis dificoltâts di concentrazion, strachece e v.i. (par esempli inçopedâsi e colâ, o cjapâ sot cualchidun) o dal lâ in piês di cundizions clinichis patidis dal lavoradôr (sincopis par vie di malatiis cardiovascolârs pregressis). Cun di plui, la radiazion solâr e pues provocâ malatiis acudis o cronichis de piel e dai voi, che a son ricognossudis ancje tant che patologjiis professionâls.

Portâi pe valutazion

Lis metodichis par valutâ lis zornadis a risi di stress termic o la intensitât ecessive des radiazions solârs e lis misuris di prevenzion relativis no son complicadis e a son acessibilis a dutis lis impresis midiant dai portâi

Autovalutazion e materiâi utii

Stant che il fenomen des ondadis di calôr si presente cuntune cierte frecuence ancje te nestre regjon, cul svicinâsi de stagjon cjalde, vie pai sorelûcs in cantîr e in aziende agricule, a saran esaminadis ancje lis misuris di prevenzion pal risi di calôr e radiazion solâr.

Lis impresis a podaran controlâ di jessi in regule cu lis Liniis di indreçament midiant des listis di control pe autovalutazion:

• Liste di autovalutazion edilizie
• Liste di autovalutazion agriculture

Par altris informazions al è pussibil contatâ la struture PSAL ae direzion di pueste eletroniche psal@asufc.sanita.fvg.it