Un dispositîf impuartant che al simule lis manovris di rianimazion sui fruts a pene nassûts al è stât donât al repart di Pediatrie di Tumieç
lunis 2 di Dicembar dal 2024
Tes setemanis passadis, te aule magne dal ospedâl di Tumieç, si è tignude la consegne uficiâl dal simuladôr didatic Newborn Anne: la donazion e je stade fate par cont de associazion “Patrick Catta”, nassude tal 2021, cualchi an dopo de muart sul lavôr di Patrick Cattarinussi, un zovin unic par gjenerositât e sensibilitât, simpri pront a judâ il prossim, e atlete di corse. Cun chest spirt, in ricuart dal fradi e amì, ogni an la associazion e done al ospedâl di Tumieç l'incàs dal memorial che i è stât dedicât.
Il simuladôr che al è stât donât al è un dispositîf che al sarà util pal adestrament realistic di ducj i moments principâi des emergjencis neonatâls: al permet di riprodusi une grande varietât di situazions che si puedin presentâ intune emergjence. Tra i frutins a pene nassûts, 1 su 10 cuant che al nas al à dibisugne di assistence ae transazion feto neonatâl. In cualchi câs râr si àn di fâ rianimazions avanzadis come la ventilazion, il massaç dal cûr, la intubazion, dutis ativitâts che si puedin riprodusi in maniere precise cun chest simuladôr neonatâl.
La emergjence che e tocje il frutin a pene nassût e va tratade in maniere imediade. Dilunc di une emergjence nol è timp par provâ o par imparâ. Bisugne savê fâ, e daurman. La simulazion e permet di riprodusi la stesse emergjence, chê plui dificile e salacor chê plui rare, par che si puedi imparâ a agjî in maniere corete cence vê pôre di fâ dams al pazient.
L'event si è davuelt ae presince dal Diretôr Medic dal presidi ospedalîr di Tumieç Loris D’Orlando, des colaboradoris Zigotti Fuso Maria e Marzia Moro de Direzion Mediche, de Presidente de Associazion Patrick Catta, Anna Cattarinussi, de Diretore de Pediatrie di Tumieç Ingrid Toller e de Coordenadore Infermieristiche Antonella Gerion, adun cuntune rapresentance dal grup di miedis e di infermîrs de Pediatrie e de Ostetricie.
Chestis a son lis peraulis di ringraciament de dotore Toller e dal dotôr D'Orlando:
"La pediatrie di Tumieç us ringracie di cûr parcè che cheste azion che o vês fate e à un valôr pardabon grant par nô. Al è un moment storic dulà che i ospedâi, massime chei plui piçui, a patissin la mancjance di personâl e di altris risorsis: il fat di vê de bande dal teritori cheste atenzion nus manten alte la motivazion di pontâ in alt, ancje midiant de formazion e des simulazions. In fin dai conts, il pont nassite di Tumieç, ancje se al è piçul, al esist propit par servî il teritori di riferiment. Chest scambi mutuâl di atenzions e di supuart al à une impuartance fondamentâl. La vuestre poie e je un valôr di prionte che nus invide a fâ simpri miôr par dâus la miôr assistence pussibile."