La Pediatrie di Tisane-Palme e fâs un gnûf video su la educazion sanitarie: la rianimazion cardiopolmonâr tal frut
joibe 6 di Avrîl dal 2023
La dotore Elisabetta Miorin, Diretore de Pediatrie dal Ospedâl di Tisane-Palme, e à fat un gnûf video di educazion sanitarie che al spieghe lis manovris di fâ cuant che un frut al à blocadis lis viis respiratoriis, duncje al è in arest respiratori, e al piert cussience.
L’obietîf principâl al è chel di sensibilizâ la popolazion suntun gjest sempliç che al pues salvâ la vite dai nestris fruts.
Lis manovris di fâ in câs di arest respiratori e di pierdite di cussience a corispuindin ae rianimazion cardiopolmonâr, o ben al massaç cardiac alternât des ventilazions bocje a bocje intal frut, e bocje-bocje nâs intal frutin di tete.
Imparâ chestis manovris salvevite al è cetant impuartant e al sarès une vore util pandi in dute la popolazion chest savê, in particolâr par gjenitôrs, nonos, insegnants e par cualsisedi che al viodi di un frut.
Pûr cence cjapâ il puest di un cors teoric e pratic PBLS, che si fasin tai ents autorizâts, il video al jude in pôcs minûts a imparâ lis manovris di rianimazion di fonde: imparâ chestis manovris di fâ in spiete dal socors sanitari (112) al pues fâ la diference e salvâ un frut.
Il video al è disponibil sul canâl youtube di ASUFC al link Rianimazione cardiopolmonare nel bambino e nel lattante.
Chest video al siere il mini-cicli scomençât cul video che al mostre e al insegne lis manovris di fâ cui sogjets di etât pediatriche in câs di scjafoiament (link video), o ben, di ostruzion complete des viis aeriis par colpe di un cuarp estrani, fin che il frut (etât parsore dal an), o il frutin di tete (frut di etât di mancul di 1 an), al è ancjemò cussient.
La dotore Miorin: “O vin pensât di fâ chescj videos par dâ aes personis, gjenitôrs, ma no dome, un strument in plui par salvâ un frut: a son istruzions semplicis che, ancje intun moment di pôre, a son facilis di visâsi e a puedin fâ pardabon la diference.
Cognossi chestis manovris al è fondamentâl e o conseìn simpri di partecipâ ai cors PBLS (Pediatric Base Life Support) inmaneâts dai ents autorizâts”.