Propuestis educativis gratuitis pes fameis e pai futûrs gjenitôrs de Cjargne

Propuestis educativis gratuitis pes fameis e pai futûrs gjenitôrs de Cjargne

“In ascolto di… te e me” e “Piccoli passi par diventare grandi” a son lis propuestis educativis gratuitis che il Servizi sociâl dai Comuns dal ambit teritoriâl de Cjargne – Aziende Sanitarie Universitarie Friûl Centrâl, in colaborazion cu la Cooperative Itaca, al propon vie pal Istât aes fameis cun fruts dai 3 ai 36 mês e ai futûrs gjenitôrs residents in Cjargne.

Musiche, cuarp e la armonie tra chescj elements a rapresentin il cûr dai trê incuintris dal progjet “In ascolto di… te e me” che, cun esperiencis concretis, al vûl ufrî ai futûrs gjenitôrs imprescj e risorsis buinis par frontâ il lavôr une vore biel e impegnatîf che ju spiete.
Ai 21 di Jugn, in colaborazion cu la associazion PraticaMenteMusica, lis futuris mamis e i futûrs papâs a podaran scuvierzi cemût che lis siet notis a son dilunc de gravidance une risorse pal lôr benstâ e par chel dal nassint. Ai 19 di Lui Sara Dorotea dal Studio Balance e centrarà la atenzion su la scolte e la comprension dai mudaments dal cuarp intai nûf mês. Infin, ai 9 di Avost, Camilla De Moro, Ostetriche Teritoriâl di ASUFC, e sierarà il progjet evidenziant la corelazion armoniche tra cuarp e musiche.

“Piccoli passi par diventare grandi”, il progjet dedicât aes fameis cun fruts dai 3 ai 36 mês al vûl ufrî spazis inusuâi e stimolants dulà che lis fameis e i fruts a puedin scuvierzisi e riscuvierzisi insiemi midiant de musiche e de relazion corporie tra di lôr e cui animâi. Un percors curt, fat di trê incuintris, che al tacarà ai 14 di Jugn cuant che la Associazion PraticaMenteMusica e proponarà une ativitât par marcâ il rûl impuartant che la musiche e à intal disvilup dai fruts. Ai 12 di Lui, Annalisa Adami de Associazion Primi Sogni, e puartarà la atenzion sul cuarp e su la relazion che si instaure tra il frut e i gjenitôrs. Ai 2 di Avost, cu la colaborazion de educadore cinofile Nedi D’Orlando, si analizarà une altre dimension de relazion, chê cui animâi, par capî cetant che al puedi jessi util savê relazionâsi in maniere positive cuntun amì a cuatri çatis par jessi po in stât di creâ bogns rapuarts cui oms. Dilunc di dut il percors il frut, adun cul adult di riferiment che lu acompagnarà, al varà la pussibilitât di sintîsi part ative dal laboratori in graciis des ativitâts proponudis, che a stimolaran la espression creative, la espression corporie e il contat cu la nature.

Par partecipâ ai incuintris, che si fasaran ducj a Tumieç, des 16 aes 18, si à di notâsi contatant nicole.straulino@asufc.sanita.fvg.it – tel. 331 2674511.

I puescj a son limitâts par favorî un clime relazionâl trancuîl e intim e par ufrî ai partecipants moments produtîfs dulà che a puedin sperimentâsi intun contest libar.

Al è ancjemò cualchi puest libar par partecipâ ae programazion “In ascolto di… te e me”. Il progjet indreçât aes fameis cun fruts di 3 a 36 mês, invezit, al è za esaurît.