Incuintri su la prevenzion dal tumôr dal colon ret: miercus ai 11 di Jugn a Tumieç

Tal 2024 lis statistichis dal tumôr dal colon in Italie a presentin une stime di cirche 48.700 diagnosis gnovis, cuntune mortalitât di cirche di 24.200 decès pal 2022. Il screening fat midiant dal esam dal sanc platât tai escrements al è un imprest che tant plui al è partecipât, tant plui al zove ae salût. Il so obietîf principâl al è chel di intercetâ lis lesions precancerosis, ven a stâi i polips o i tumôrs intune fase precoce de malatie, che duncje a son plui facii di curâ.

“Tal Friûl-Vignesie Julie, ancje in gracie dal program di screening inviât tal 2008 e dai nivei elevâts di popolazion cuvierte – al declare Francesco Gongolo, Diretôr de SOSD pal Screening e pes Malatiis Cronichis degjenerativis di ASUFC – la mortalitât pal tumôr dal colon ret tai ultins 15 agns si è sbassade di passe il 30% sedi pai oms che pes feminis (-32,2% pes feminis e -37,1% pai oms)”.

Tal 2024, tal Friûl-Vignesie Julie, la percentuâl di adesion al invît pal esam dal sanc platât tai escrements e je stade dal 53%. Ae plui part dai citadins positîfs al sanc platât e je stade fate la colonscopie dentri di 30 dîs, e il 30% di lôr a vevin lesions tal colon.

"Dai dâts che a son vignûts fûr – e declare Debora Berretti, Presidente regjonâl de AIGO ("Associazione Italiana Gastroenterologi ed Endoscopisti Ospedalieri") e Diretore de SOC di Gastroenterologjie dal Ospedâl di Udin – si dedûs che tal Friûl-Vignesie Julie il screening pal tumôr dal colon ret al è valit par ce che al inten la ecuitât e i risultâts, ma al è ancjemò tant lavôr di fâ, massime tal cjamp des adesions.”

L'apontament al è par miercus ai 11 di Jugn a Tumieç, te Sale Bergnach (Aula Magna) dal Ospedâl di Tumieç, a partî des 20:30.

Al event a saran presints ancje il Responsabil Aziendâl pal Screening e un grup di infermîrs cualificâts, cul obietîf di pandi informazions fondamentâls su la prevenzion e su la diagnosi precoce di une des malatiis che a fasin plui pôre, ma che si pues tratâ cun sucès se si le cjape par timp.

“La informazion e je la clâf par che il program di screening al vegni acetât cun serietât de bande de popolazion. O vin di superâ lis pôris e lis difidencis, e di educâ ducj a deventâ part ative te lôr salût”, e à declarât la dotore Berretti.

Un aspiet fondamentâl di chestis iniziativis e je la colaborazion tra miedis, infermîrs e altris professioniscj sanitaris. “L'infermîr – e dîs Arianna Martinis, Responsabile de Plateforme Endoscopiche di ASUFC – al à une part fondamentâl tal sensibilizâ, dant supuart ai pazients, rispuindint aes lôr domandis e sigurantsi, par esempli, che a sedin preparâts ae colonscopie te maniere corete.”

Si invide duncje a partecipâ a chescj incuintris e a fâ il screening, par vê cure di sè e des personis che si àn a cjâr, cu la cussience che la prevenzion e je il prin pas fondamentâl te lote cuintri dai tumôrs.