“Prevenzion e riabilitazion pe salût cardiovascolâr”: cunvigne impuartante tal Senât de Republiche
vinars 3 di Mai dal 2024
E jere presinte la dotore Werren, responsabile de Cardiologjie Riabilitative dal IMFR Gervasutta
Intai dîs passâts si è tignude te sede dal Senât de Republiche la cunvigne “Prevenzione e riabilitazione per la salute cardiovascolare” (“Prevenzion e riabilitazion pe salût cardiovascolâr”), promovude di ITACARE-P (Italian Alliance for Cardiovascular Rehabilitation and Prevention), cu la colaborazion di Summeet.
Dilunc dal event, a son stadis ilustradis lis cuatri strategjiis fondamentâls “par ridusi il pericul a nivel individuâl e par miorâ la assistence ae popolazion” cun malatiis cardiovascolârs, ven a stâi:
- tignî plui controlâts i fatôrs cardiometabolics;
- adatâ il stîl di vite;
- fâ plui atenzion ai aspiets psicosociâi;
- incressi la culture de riabilitazion e de teleriabilitazion.
Tra i relatôrs, Francesco Paolo Sisto (viceministri e sotsegretari ae Justizie), Marco Ambrosetti (President di ITACARE-P), Beatrice Lorenzin (za Ministre de Salût), e Elena Murelli (Presidente dal Intergruppo Parlamentare Malattie Cardiocerebrovascolari).
La dotore Marika Werren, responsabile de Cardiologjie Riabilitative dal IMFR Gervasutta, e à partecipât al event tant che componente dal Comitât Sientific di ITACARE-P.