Inviât un percors dedicât par pazients cun diabete di gjenar 1

Ai 20 di Novembar in ASUFC al è partît il progjet "Vivi cul Diabete di Gjenar 1 - Percors Psicoeducatîf in 4 Incuintris", nassût de colaborazion tra la Cliniche Psichiatriche e DCA e la Struture di Diabetologjie de Aziende Sanitarie Universitarie dal Friûl Centrâl, dedicât ai pazients che a convivin cun cheste patologjie.

"La ricercje e dimostre che il supuart psicologjic al miore la aderence terapeutiche e al sbasse il pericul di complicancis, favorint la riduzion dal stress te vite di ogni dì causât de gjestion de lôr cundizion. Chest progjet, unic tal so gjenar in Friûl-Vignesie Julie, al vûl jessi un prin pas viers lis personis cun Diabete di gjenar 1, par ufrî une cure simpri plui empatiche e dongje de persone", al sclarìs il Dot. Andrea Da Porto, responsabil de SOSD Diabetologjie e coordenadôr de Rêt Diabetologjiche di ASUFC.

In regjon a son plui di 7.000 personis che a convivin cul diabete di gjenar 1, une cundizion croniche che no domande dome atenzion cliniche, ma ancje un ecuilibri psicologjic fuart par jessi gjestide te miôr maniere. Studis resints a mostrin che fin al 40% dai pazients al sperimente ansie o depression leadis ae gjestion cuotidiane de malatie: lis ripercussions sul stât di salût des personis a son impuartantis e a puedin fâ in mût che il control de glicemie al sedi fat piês e/o che la persone e cori un pericul plui alt di jessi ricoverade pes complicancis acudis dal diabete di gjenar 1. 

Il percors al propon 4 incuintris di 2 oris ogni setemane, vuidâts di psicolics esperts in psicodiabetologjie, cul obietîf di rinfuarçâ la motivazion, ridusi il stress e miorâ la cualitât de vite midiant di metodologjiis come la psicoeducazion interative, la mindfulness, il role-playing e la condivision des esperiencis.

Il percors di psicoeducazion al vignarà fat plui voltis vie pal an, daûr des domandis che lis personis cun diabete di gjenar 1 a presentaran ae Struture Diabetologjiche di Udin.

"Ufrint assistence psicologjiche une vore cualificade aes personis che a scomençaran chest percors, si podarà ufrî un supuart complet e integrât" e dîs la dot.e Sarah Perini, psicolighe e infermiere esperte di diabete, coideadore dal progjet adun cul psicolic Dario Marin. 

I obietîfs dal cors a son chei di disvilupâ une cussience emotive plui alte, miorâ la autoeficacie, ridusi il stress e potenziâ lis abilitâts relazionâls.

"Il diabete nol è dome une cuistion di glicemie: al è une sfide che e cjape dentri cjâf, emozions e relazions. Cun chest percors o volìn dâ aes personis imprescj concrets par sintîsi plui fuartis e mancul bessolis", al aferme il Prof. Marco Colizzi, diretôr de Cliniche Psichiatriche.

I numars dal diabete di gjenar 1 in Italie

• 4 milions di personis cun diabete (6,3% de popolazion)
• 300.000 cun diabete di gjenar 1 (cirche il 10% di ducj i câs)
• +28% di incressite de prevalence dal gjenar 1 tai ultins 30 agns  
• 14 miliarts di euros: cost anuâl pal SSN, di chescj il 75% al è leât a complicancis che si puedin evitâ
• 40% dai pazients cun diabete di gjenar 1 al sperimente ansie o depression 
• Cirche il 30% dai zovins cun DM1 al sofrìs di Diabulimie (omission volontarie de terapie insuliniche)
• La prevalence di Disturps dal compuartament alimentâr e je 10 voltis plui grande tai pazients cun DM gjenar  1 rispiet ae popolazion gjenerâl