La Pediatrie di Tumieç ricognossude tant che Presidi Nati per Leggere&Nati per la Musica
La Pediatrie di Tumieç e je stade ricognossude tant che Presidi Nati per Leggere&Nati per la Musica de Segretarie Nazionâl Nati per Leggere: la targhe pal Presidi Nati per Leggere&Nati per la Musica, picjade tal ingrès dal Repart e in altris ambients dulà che si concentre la ativitât cliniche, e ricognòs la atenzion e il lavôr de Pediatrie di Tumieç dai ultins agns.
La dot.e Ingrid Toller, diretore de Pediatrie: "Si sin impegnâts a favorî la cognossince dai servizis dedicâts ae prime infanzie, presints sul teritori par semplificâ l'acès a chestis risorsis, par implementâ il sens di comunitât e par fâ in mût che la rêt dai servizis e funzioni te miôr maniere furnint messaçs educatîfs omogjenis. O vin colaborât cul Centri pes Fameis di Tumieç, cul Servizi Sociâl e cui educadôrs de Cooperative Itaca, cui Pediatris di Libare Sielte, cui volontaris di NPL, cu la Biblioteche di Tumieç e cu lis Scuelis. Il potenziament de rêt e de cognossince tra operadôrs de rêt al à permetût di dialogâ in maniere plui direte ancje tra di nô, rindintnus plui unîts e cussients des oportunitâts che ogni servizi al ufrìs e facilitant la divulgazion di events significatîfs pe gjenitorialitât, ancje in Ospedâl"
"O ritignìn che lei a vôs alte ai fruts fin de prime infanzie, ancje a tacâ dal concepiment, e sedi une ativitât che e cjape dentri une vore sedi il gjenitôr che il frut e che e rinfuarcedi la lôr relazion. Di fat, o vin inserît chest messaç ancje in forme scrite, integrant la letare di dimission dal neonât, cuntun paragraf "speciâl" risiervât aes buinis pratichis. In Ospedâl come sul teritori si à di trasmeti messaçs educatîfs e di prevenzion che a vedin impat ancje a tiermin lunc".
La Pediatrie di Tumieç e sosten la leture tant che pratiche slargjade e acessibile, buine di ufrî beneficis a tiermin lunc pal benstâ di fruts e fameis. Di fat, la leture e je une ativitât di cure e di relazion: chest ricognossiment al rinfuarce la filosofie che il Repart di Pediatrie al à fat buine dilunc dai agns e al è di stimul pai prossims progjets e iniziativis.