La magjie des peraulis e de musiche e rive in Pediatrie a Tumieç
In gracie de iniziative dai students de Scuele secondarie di prin grât "Gianfrancesco da Tolmezzo"
Un dopomisdì speciâl, fat di emozions, musis di ridi e condivision, al à cjapât vite tal repart di Pediatrie di Tumieç, in gracie de iniziative di un grup di students de scuele secondarie di prin grât "Gianfrancesco da Tolmezzo", acompagnâts des insegnantis Maria Elena D'Agostini e Anna Di Qual, protagoniscj di un event di leturis musicadis dedicât ai piçui pazients.
La ativitât, pensade par puartâ un moment di lizerece e di serenitât ai fruts ricoverâts, e à viodût i fantats impegnâts te leture a alte vôs di contis, flabis e tescj sielts cun cure, acompagnâts di intervents musicâi sempliçs. Lis notis, sunadis cun struments come ghitare, violin e flaut, a àn rindude cheste esperience ancjemò plui inmagante, trasformant lis peraulis intun viaç imagjinari bon di fâ dismenteâ, ancje dome par un pôc, il dran dran dal ospedâl.
La iniziative e fâs part di un progjet educatîf plui grant, che al à l'obietîf di sensibilizâ i zovins al valôr de solidarietât, de empatie e dal volontariât. Pai students, di fat, no je stade dome une ocasion par esprimi la proprie creativitât, ma ancje une oportunitât concrete par metisi in relazion cun chei altris e capî la impuartance des piçulis azions.
La ativitât e fâs part de rêt citadine di promozion de leture che e à il so cûr te Biblioteche Civiche di Tumieç, che la scuele e colabore cun jê in maniere ative, ancje midiant di iniziativis di beneficence che a àn l'obietîf di potenziâ la ufierte bibliografiche destinade propit al repart di Pediatrie.
Il personâl sanitari e lis fameis dai pazients a àn agradît une vore cheste iniziative, e a àn evidenziât cemût che moments come chest a puedin contribuî al benstâ emotîf dai fruts, rindint plui ospitâl e uman l'ambient dal ospedâl.
Une esperience che si spere di podê ripeti parcè che cualchi volte e baste une storie e une melodie par fâ pardabon la diference!