"Tra cjarecis e leturis... al timp dai natîfs digjitâi": iniziative de Pediatrie di Tumieç sabide ai 20 di Setembar

Sabide ai 20 di Setembar des 10.00 aes 12.00 te Aula Magna dal Ospedâl di Tumieç si davuelzarà l'incuintri "Tra cjarecis e leturis... al timp dai natîfs digjitâi": l'obietîf al è chel di contâ ai gjenitôrs che a scomencin, o  che a stan par scomençâ, il lôr percors di adults  educadôrs la impuartance che la barconete temporâl des primis 1000 zornadis di vite e à pal disvilup cognitîf, emotîf, relazionâl e motori dal frut,  cemût che a confermin lis neurosiencis.

"I prins 1000 dîs, ven a stâi chei che a van dal concepiment a cuant che il frut o la frute a finissin doi agns, a son determinants pal lôr disvilup e benstâ futûr e a rapresentin une barconete temporâl strategjiche di oportunitâts - e aferme la dot.e Ingrid Toller, diretore de Pediatrie di Tumieç - I fruts, tai prins 1000 dîs di vite, a esprimin un potenziâl di aprendiment che no si ripetarà plui e l'ambient dulà che il frut al vivarà i siei prins agns di vite al influìs in maniere determinante su la formazion de sô personalitât e sul so disvilup emotîf e cognitîf".

Dedicâsi ae leture condividude di un libri al vûl dî passâ il timp insiemi, une esperience che e promôf il disvilup di un leam sigûr dal frut o de frute cui adults di riferiment e al zove ancje a la mame e al pai, rinfuarçant la lôr fiducie tes propriis competencis gjenitoriâls.

Scoltâ un adult che al lei fin dai prins mês di vite, ancjemò prime di vê imparât a fevelâ, al sveltìs il procès di aprendiment dal lengaç, sedi te comprension des peraulis, sedi te capacitât di doprâlis. Il disvilup di une conte pagjine dopo pagjine al insegne a ricognossi la struture di un discors, la sucession logjiche dai siei passaçs. Lis ilustrazions a judin a esercitâ la viste, che e devente simpri plui fine, e a dâ un non ai ogjets rapresentâts.

Par fâ in mût che dut chest al vedi un sens, bisugne che i libris proponûts ai fruts ur permetin di ricevi significâts, sensazions, emozions. A zirin tancj libris par fruts, ma no ducj a stimolin lis emozions e la ment dal frut inte stesse maniere. Insiemi ae colaborazion dai referents teritoriâi di Nati per Leggere e de Biblioteche dal Comun di Tumieç a saran furnîts esemplis pratics su la sielte di libris plui adate par ogni fasse di etât. 

Dongje dal messaç su la impuartance de leture, l'incuintri al vûl ancje concentrâsi su la dimension digjitâl, rindint i gjenitôrs cussients des evidencis sientifichis rispiet ai pericui pe salût psicofisiche dai fruts, come distûrps dal sium, emotîfs e sociâi, che a divegnin dal ûs esagjerât e/o scoret des tecnologjiis audiovisivis e digjitâls, in CRESSITE COSTANTE in cheste fasse di etât une vore delicade, cemût che a evidenziin i reports di Sorveglianza 0-2.

L'incuintri al sarà ancje une ocasion par fâ cognossi ae popolazion i sîts di incuintri sul teritori e lis iniziativis dedicadis ai 1000 dîs.

La iscrizion, di fâ dentri dai 15 di Setembar midiant dal QR code su la locandine, e je sore nuie e al sarà pussibil puartâ i fruts (segnalantlu in fase di iscrizion), che a saran intratignûts dai volontaris di Nati per Leggere e dai educadôrs.