Sucès a Palme par "Una manovra per la vita": pediatris a disposizion par insegnâ piçulis azions che a salvin la vite

Domenie ai 23 di Otubar, in Place Grande a Palme si è davuelte la manifestazion nazionâl “Una manovra per la vita”, par cure de Società Italiana Medicina Urgenza Pediatrica - SIMEUP, patrocinade e promovude de Aziende Sanitarie Universitarie Friûl di Mieç (ASUFC) cu la colaborazion dal Comun di Palme pai aspiets logjistics.

L'event, inmaneât in contemporanie in tantis placis talianis, al veve l'obietîf di sensibilizâ su la prevenzion dal scjafoiament dai fruts e di insegnâ lis manovris che a salvin la vite, che a saressin di fâ tai câs di scjafoiament dai fruts e dai adults.

La manifestazion, indreçade a dute la popolazion, in particolâr ai gjenitôrs, ai nonos e ai operadôrs che si interessin di infanzie, si è fate ancje chest an dopo dal stop pe pandemie di Covid-19.

Te Loze de Gran Vuardie, un grup di pediatris e di infermîrs pediatrics istrutôrs di rianimazion pediatriche de Regjon, coordenâts de dotore Elisabetta Miorin, diretore de Pediatrie dal Presidi Palme-Tisane, si son metûts a disposizion de popolazion par dimostrâ te pratiche, midiant di manichins pediatrics, cemût intervignî tal câs di scjafoiament.

L'event al è stât un sucès, a àn partecipât une vore di personis: tantis fameis cun fruts, ma ancje nonos e operadôrs de infanzie si son metûts in zûc provant in maniere direte lis manovris sui manichins.

Ancje i fruts a son stâts une vore atents: tancj di lôr, incuriosîts dai manichins, a àn volût provâ lis manovris, e lis àn imparadis ae perfezion.

I istrutôrs a àn sintût une atmosfere ferbinte e di sodisfazion, e un sintiment gjenerâl di ricognossince de bande di ducj i partecipants.

La stesse manifestazion si è davuelte in contemporanie ancje a Cividât, inmaneade dai pediatris Vincenzo Colacino e Agostino Nocerino; e jere za stade fate in anteprime sabide ai 8 di Otubar a Triest, te ocasion de Barcolane, ancje chi cuntune partecipazion grande, a dimostrazion dal interès fuart par cheste tematiche.

Magari cussì no, ogni an in Italie desenis di fruts (e ancje di adults) a muerin par scjafoiament, ven a stâi par vie de ostruzion des viis aeriis causade di alc di estrani, soredut robe di mangjâ e parts di zuiatui, e rimarche la dotore Elisabetta Miorin, istrutore SIMEUP F-VJ.

Di fat, il scjafoiament al rapresente la seconde cause di muart in etât pediatriche dopo dai incidents stradâi.

La etât plui pericolose e je chê dai 6 mês ai 2 agns: lis vitimis a son i plui piçui, parcè che a cirin di metisi in bocje i ogjets par cognossi il mont ator, e ancje parcè che mastiâ cence ducj i dincj e gloti in maniere pôc coordenade al pues facilitâ chescj incidents.   

Tocs di cjar, grans di ue, luianiis di Viene, caramelis duris, pomis secjis, robe di mangjâ no avonde taiuçade e dure, ma ancje ogjets tant che balonuts flaps o tocs di zuiatul, a puedin deventâ pardabon pericolôs lant par stuart ai fruts, soredut ai plui piçui.

Par chest e je fondamentâl prime di dut la prevenzion, fasint atenzion ae preparazion de mangjative dai fruts piçui, che e à di jessi simpri ben sfruçonade e de consistence juste pe etât dal frut; si à di vuardâsi ancje dai zuiatui che si puedin dividi in tocs piçui, o di altris ogjets che il frut al podarès cjatâ e metisi in bocje intun moment di distrazion de persone che e viôt di lui.

Si puedin evitâ tancj muarts cuntun intervent svelt che no simpri al è compatibil cui timps di spiete dal Socors. Savê cemût reagjî a colp intune situazion di chestis, cun azions semplicis, al pues fâ la diference par salvâ un frut, di là de clamade fondamentâl che si à di fâ dut câs al 112.

L'obietîf di chest event anuâl al è chel di insegnâ, cul aiût di manichins di rianimazion, lis azions pratichis e imediadis di fâ tal câs di scjafoiament, in particolâr dai fruts piçui sot dal an di vite (frutins di lat) e in chei di un an insù, cjapânt dentri i adults.

L'apontament de “manovre pe vite”, midiant dal contat cun istrutôrs esperts e de pussibilitât di provâ lis manovris in maniere direte cun manichins di pueste, al è stât dal sigûr une ocasion buine par imparâ lis manovris e par savê intervignî par timp.

Propit par difondi simpri di plui la cognossince di chestis manovris impuartantis e par sensibilizâ la popolazion sul teme de prevenzion dal scjafoiament in etât infantîl, al è a pene stât realizât un video de ASUFC là che la dotore Elisabetta Miorin e mostre lis manovris di fâ par parâ fûr un ogjet estrani che al scjafoie un frut: ducj i interessâts a imparâ chestis manovris impuartantis par salvâ la vite a puedin viodi chest video, midiant di chest link sul canâl YouTube de ASUFC.