Ostetricie e Gjinecologjie di San Denêl: iniziativis pes futuris mamis e pai neogjenitôrs

La Ostetricie e Gjinecologjie di San Denêl e reste un pont di riferiment dentri di ASUFC: la struture e ufrìs une schirie di servizis e di iniziativis inovativis che a permetin di vivi une esperience complete intal percors di gjenitorialitât.

Dal mês di Avrîl dal 2023, sedi aes feminis in gravidance che ai neogjenitôrs ur ven dade la pussibilitât di partecipâ in maniere gratuite ai incuintris sul “babywearing”, une pratiche di maternage che e consist intal puartâ il propri frut "intor" midiant di supuarts tant che fassis e/o marsupis.

La traduzion leterâl dal tiermin "babywearing” e je di fat "meti sù il frut”.

Lis informazions che a vegnin furnidis a son utilis par svicinâsi al mont dal “puartâ” e duncje par difondi cheste azion tant che une buine pratiche.

Tra i beneficis che a son stâts dimostrâts in gravidance, par esempli, a son

• Evitâ e/o ridusi la iperlordosi,
  
  
• Slizerî il pês su la zone pubiche e il scaric de schene e des spalis distribuît in maniere uniforme

Pal neonât, il rispiet dai siei bisugns primaris, il disvilup de propriocezion corporâl, une ossigjenazion e une termoregolazion miôr, il rispiet des funzions fisiologjichis dai orghins e un solêf impuartant pes colichis e pai riflùs.

Pai neogjenitôrs invezit al zove tant che "puint" par favorî l'afiet e la scolte empatiche tra gjenitôrs e fîs, incressint cun di plui la fiducie intes propriis capacitâts maternis e gjenitoriâls.

Dentri de struture al è stât creât ancje l’ “Arc di sant Marc dai nestris frutins", là che ogni frut nassût al à un curisin che al ven picjât cul non inte salute di spiete. Cuant che al fâs un an, la mame e pues lâ in repart a cjoli chest piçul ricuart.

Infin, al è simpri atîf il servizi WhatsMUM, un servizi di informazion che si poie su la aplicazion gratuite WhatsApp, li che cun scjadincis programadis a vegnin inviadis une schirie di indicazions e di conseis sui argoments tipics de gravidance tant che il part, il latament e il latoeç. Inviât intant de pandemie, il servizi al conte plui o mancul 850 iscritis e al è une vore preseât tra lis utentis.

A vegnin simpri garantîts i cors di acompagnament ae nassite in presince prin e dopo dal part in colaborazion multiprofessionâl cun altris figuris sanitariis e, dopo dal part, cors di massaç al neonât, alimentazion complementâr e liberazion des viis aeriis dal neonât; infin, a van indenant i incuintris mensîi su lis vacinis e sui incidents in cjase, in colaborazion cul anestesist pe partanalgjesie e il dipartiment di prevenzion.

Il Diretôr de Struture, dotôr Michele Vanin: “O sin une realtât une vore ative e si impegnìn ogni dì par miorâ la assistence cun chê di garantî simpri nivei di cualitât alts e curis justis e siguris: la rispueste che o vin e je pardabon positive e o volìn ufrî servizis simpri plui complets par fâ in mût che i futûrs neogjenitôrs a vedin une esperience serene. Il nestri servizi al è indreçât a dutis lis feminis che a jentrin te sfere di ASUFC, cence vincui leâts ae sielte dal lûc dulà parturî, une sielte che e reste libare e personâl.”