Open Week cuintri de violence su lis feminis: dai 21 ai 28 di Novembar iniziativis ancje tes struturis di ASUFC

In ocasion de Zornade Internazionâl pe eliminazion de violence cuintri des feminis che si celebre ai 25 di Novembar, Fondazione Onda ETS e organize la cuinte edizion de (H) Open Week dai 21 ai 27 di Novembar.

La iniziative e à l'obietîf di incoragjâ lis feminis vitimis di violence a domandâ aiût e acedi ae rêt di servizis di supuart e acet protet. Dilunc di cheste setemane, plui di 200 ospedâi cul Bolin Rose e i Centris antiviolence che a aderissin ae iniziative a ufriran sore nuie servizis clinics e informatîfs, consulencis e colocuis.

Chest an, in plui, il progjet al sarà sostignût ancje des farmaciis cul Bolin RoseVert, che dai 24 ai 28 a ufriran sore nuie supuart psicologjic par telefon des 10:00 aes 13:00 al numar 393-7344521 e supuart legâl par telefon des 14:00 aes 17:00 al numar 393-7141900.

La iniziative e fâs part di un progjet plui grant che aromai al è puartât indenant de Fondazion Onda ETS dal 2021 e che tal 2025 al à viodût la realizazion di une indagjin, in colaborazion cun Elma Research, e di une campagne di comunicazion finalizade a ridusi i prejudizis culturâi e a sensibilizâ su la paritât di gjenar. Chest an, di fat, la iniziative si concentre su la educazion e la sensibilizazion su lis discriminazions di gjenar, cul obietîf di promovi la cussience dai bias culturâi e di stimolâ la costruzion di relazions fondadis sul rispiet e su la paritât di gjenar.

Ancje lis struturis di ASUFC a partecipin cun svariadis iniziativis sul teritori. 

Udin

La Cliniche di Ostetricie e Gjinecologjie e organize vinars ai 28 di Novembar aes 15.00 l'incuintri "Insiemi cuintri de violence: il rûl de sanitât tal tutelâ e acompagnâ lis vitimis" - Confront cun operadôrs sanitaris, psicolics, fuarcis dal ordin e associazions dal teritori.

Tisane

Vinars ai 21 e martars ai 25 di Novembar des 9.30 aes 12.30, li dal ingrès principâl dal ospedâl, si fasaran ativitâts di infopoint e di distribuzion di materiâl informatîf.
Si furniran dutis lis informazions sui centris antiviolence e sui servizis di poie, jutori, percors protets mari-frut, supuart legâl e psicologjic, supuart gjenitorialitât, numars utii e servizis di scolte.

Tumieç

La Struture di Gjinecologjie e Ostetricie dal Ospedâl e la Associazion Voce Donna Centri Anti-Violence di Tumieç sabide ai 22 di Novembar a ufriran insiemi e sore nuie servizis clinics, informativis consulencis e colocuis.  

Par prenotâsi e cjapâ apontament, contatâ la segretarie dai ambulatoris di Gjinecologjie dal lunis al vinars des 8.30 aes 14.30.      

Glemone

Voce Donna e il Servizi Sociâl dai Comuns a organizin vinars ai 28 di Novembar aes 17.30 te Sale Consiliâr di Glemone un incuintri dal titul: "La rêt antiviolence: imprescj imediâts e tutele pes vitimis".