Open Week Onda: iniziativis des struturis di ASUFC te setemane dedicade ae salût de femine (dai 22 ai 29 di Avrîl)
Une setemane dedicade par intîr ae salût de femine, cun servizis clinics e diagnostics e informatîfs gratis: dai 22 ai 29 di Avrîl, in ocasion de 11e Zornade nazionâl de salût de femine, ASUFC e aderìs al (H) Open Day su la salût de femine promovude di Fondazione Onda ETS. Tai 253 presidis che a aderissin al network cul Bolin Rose, a saran ufiertis ae popolazion feminine visitis, esams strumentâi, consulencis telefonichis, colocuis a distance e events informatîfs.
Si puedin consultâ i servizis sul sît www.bollinirosa.it, midiant di un motôr di ricercje indicizât par regjon, provincie e aree specialistiche.
Fondazione Onda ETS, Osservatori nazionâl su la salût de femine e di gjenar, dal 2007 e atribuìs il Bolin Rose ai ospedâi che a garantissin servizis dedicâts ae prevenzion, diagnosi e cure des principâls patologjiis che a rivuardin lis feminis. Vuê il network al è formât di 370 ospedâi distribuîts su dut il teritori nazionâl.
La (H) Open Week su la salût de femine e rapresente la espression plui concrete di cheste rêt. Tai ultins agns: la partecipazion a cheste iniziative e je lade in cressi: di 133 ospedâi che a aderivin tal 2020 a 265 tal 2025. Une tindince che e testemonee la atenzion simpri in cressi des struturis sanitariis bande une mentalitât atente al gjenar e bande la prevenzion tant che jeve strategjiche di sanitât publiche.
L'impat de (H) Open Week si misure ancje tai numars des prestazions furnidis. Tal 2020, no cate la emergjence de pandemie, a son stâts ufierts plui di 2.200 servizis gratis, tra chescj 1.639 visitis e consulencis (71%) e 439 esams strumentâi (19%). Tal 2025 lis prestazions a àn superât cuote 13.300, tra visitis, esams strumentâi, consulencis telefonichis e ativitâts di sensibilizazion.
Une ufierte largje e multidissiplinâr che e cjape dentri cetantis areis specialistichis, tra chestis cardiologjie, gjinecologjie e ostetricie, endocrinologjie, neurologjie, oncologjie gjinecologjiche e mediche, senologjie, reumatologjie, psichiatrie, nutrizion e percors dedicâts ae violence su la femine.
Ancje ASUFC, cu lis struturis di Ostetricie e Gjinecologjie dal Dipartiment Mame-Frut, e partecipe ae Open Week Onda: al è za di plui di cualchi an che ducj i Ospedâi a an otignût il ricognossiment dai bolins rose che a identifichin lis struturis che a àn dedicât une atenzion particolâr ai percors clinics assistenziâi des feminis.
Intal detai, chestis a son lis iniziativis, dutis gratis, dividudis daûr de aree teritoriâl:
Aree dal Friûl di Mieç (Udin)
Aree de Basse (Tisane-Palme)
Aree Friûl de Alte (San Denêl - Tumieç)
Tumieç
ai 24 di Avrîl des 8.30 aes 13.30
Sede: Ospedâl gnûf - 1n plan
Visitis gjinecologjichis e consulencis (par apontament)
Prenotazion midiant de segretarie ambulatoriâl de Struture di Ostetricie-Gjinecologjie al numar 0433 488240 des 8.30 aes 14.30.