(H) Open Day su la Menopause: ai 18 di Otubar visitis e servizis a gratis in plui di 160 ospedâi cul Bolin Rose di Fondazione Onda ETS

Te ocasion de Zornade mondiâl de Menopause, che si ten ai 18 di Otubar, Fondazione Onda ETS e inmanee la seconde edizion di (H) Open Day Menopause, cjapant dentri i ospedâi cul Bolin Rose. La iniziative e à tant che obietîf chel di sensibilizâ lis feminis sui mudaments che a compagnin la menopause e su lis strategjiis comportamentâls, diagnostichis e terapeutichis che a permetin no dome di fâ lâ in miôr i disturps che a segnin lis problematichis tal periodi curt, ma ancje di prevignî e/o di ridusi lis complicazions tal periodi medi lunc, come lis malatiis cardiovascolârs, la osteoporosi e lis demencis.

Cui 7 di Otubar si podaran consultâ ducj i servizis ufierts, lis datis, i oraris e lis modalitâts di prenotazion sul sît www.bollinirosa.it. Al è pussibil sielzi la regjon e la provincie che e interesse par visualizâ la liste dai ospedâi che a aderissin.

Ancje lis struturis di Ostetricie e Gjinecologjie de ASUFC, che za di tancj agns a àn il Bolins Rose di Onda, a partecipin al event cun plui iniziativis, in particolâr:

Udin

Un dopomisdì cun doi apontaments (viodi la locandine zontade):

• Aes 15.00 pratiche di Yoga cu la dotore Giovanna Biasioli (si à di prenotâsi al numar 3493273394)
• Aes 17.30 incuintri cui esperts (ingrès libar)

Cividât

Visitis gjinecologjichis e controi gratuits des 8.00 aes 13.00 tal ambulatori dal Distret (vie Carraria, 29 – secont plan): la prenotazion e je obligatorie, si à di clamâ il numar 0432 559695 di lunis a vinars des 8.00 aes 13.30.

San Denêl

Visitis gjinecologjichis e controi gratuits des 14.00 aes 18.00 tai ambulatoris di ostetricie e gjinecologjie dal Ospedâl: la prenotazion de visite gjinecologjiche e je obligatorie, si à di telefonâ ae segretarie des 8.30 aes 18.00 di lunis a vinars al 0432 949325.

Tumieç

Visitis gjinecologjichis gratuitis des 8.30 aes 13.30 tai ambulatoris di ostetricie e gjinecologjie dal Ospedâl gnûf, tal prin plan: si à di prenotâ la visite gjinecologjiche telefonant al numar 0433 488240, o lant di persone, te segretarie di Tumieç des 8.30 aes 14.30 di lunis a vinars.

Il scandai

«O vin fat un scandai, cu la colaborazion dal Istitût di ricercje Elma Research, intitulât “La menopausa nella vita delle donne” fasint une interviste a 600 feminis tra i 45 e i 55 agns: ce che al è vignût fûr, al è che su chest teme no mancje la informazion, ma e je superficiâl e lis feminis a convivin in maniere passive cui segnâi di cheste etât di passaç. Cul fat che vuê si vîf di plui, lis feminis a podaressin passâ ancje trente agns in menopause, che al è un timp lunc: par miorâ in maniere significative la cualitât de vite e limitâ l'impat des malatiis cronichis degjenerativis, a puedin judâ la informazion juste, la prevenzion atente e, se al covente, un tratament adat dai sintoms», cussì e à declarât Francesca Merzagora, Presidente di Fondazione Onda ETS.