Open Day Menopause: ai 18 di Otubar visitis a gratis in plui di 130 ospedâi cul Bolin Rose di Fondazione Onda

Te ocasion de Zornade mondiâl de Menopause, che si ten ai 18 di Otubar, Fondazione Onda e inmanee l’(H) Open Day Menopause, cjapant dentri i ospedâi cul Bolin Rose. La iniziative e à tant che obietîf chel di sensibilizâ lis feminis sui mudaments che a compagnin la menopause e su lis strategjiis comportamentâls, diagnostichis e terapeutichis che a permetin no dome di fâ lâ in miôr i disturps che a segnin lis problematichis tal periodi curt, ma ancje di prevignî e/o di ridusi lis complicazions sul periodi medi-lunc, come lis malatiis cardiovascolârs, la osteoporosi e lis demencis.

“Cul slungjâsi des aspetativis di vite, in dì di vuê la femine e à la prospetive di passâ in menopause cirche trente agns: un periodi lunc li che une informazion corete, une prevenzion atente e une juste terapie ormonâl sostitutive, cuant che e je necessarie, a puedin contribuî in maniere significative a miorâ la cualitât de vite cuntun impat su lis malatiis cronichis degjenerativis”, e dîs Francesca Merzagora, Presidente de Fondazione Onda.

Lis passe 130 struturis dal network Bolin Rose che a àn cjapât part ae iniziative a ufriran a gratis servizis clinics e diagnostics e informatîfs aes feminis, tant che consulencis e colocuis, esams strumentâi, conferencis, info point e distribuzion di materiâi informatîfs.

Tacant cui 9 di Otubar si podaran consultâ ducj i servizis ufierts, lis datis, i oraris e lis modalitâts di prenotazion sul sît www.bollinirosa.it. Al è pussibil sielzi la regjon e la provincie che e interesse par visualizâ la liste dai ospedâi aderents.

Pe ocasion, la Gjinecologjie e Ostetricie di Udin e à previodût di tignî viert l’ambulatori de Menopause te buinore dai 18 di Otubar des 8.00 aes 13.30 (prenotazion al  0432 559695) e tal dopomisdì si fasarà un incuintri sul teme “rivoluzion menopause” in colaborazion cu la associazion Menopauseboost li de Tor di Sante Marie, vie Zanon 24 a Udin aes 18.00.

A Tumieç l’ambulatori al sarà viert tal dopomisdì dai 18 di Otubar des 14.30 aes 18.30: la prenotazion e je necessarie clamant il numar 0433 488240.

“Intun moment che la disinformazion e cjape simpri plui pît, al è impuartant dâ i imprescj necessaris par superâ tabù e prejudizis su la salût des feminis, prin di dut su la menopause, une fase naturâl ma che dispès e da malstâ. Al è propit par chest che nô di Theramex o sin impegnâts a supuartâ lis feminis in ogni part de lôr vite, judantlis a vivi te maniere miôr pussibile cun soluzions validis che a rispuindin dal dut aes esigjencis di salût e di benstâ des feminis: de contracezion aes curis pe fertilitât, dai trataments pe menopause ae cure e prevenzion de osteoporosi. Dut câs, par fâ dut chest, al è fondamentâl creâ une rêt di colaborazion cui protagoniscj principâi dal setôr de salût, tant che societâts sientifichis, associazions di pazients e istituzions, in maniere di dâ vôs a chestis esigjencis e, li che al è pussibil, cjatâ un soluzion”, e aferme Javier Carpintero, Cluster general manager par Italie, Spagne e Portugal Theramex.

Dal 2007 Fondazione Onda e da il ricognossiment dal Bolin Rose ai ospedâi che a furnissin servizis dedicâts ae prevenzion, ae diagnosi e ae cure des patologjiis principâls des feminis. La rêt, che e je daûr a rinovâsi, cumò e je fate di 354 ospedâi sul teritori nazionâl, e e poie Fondazione Onda tal promovi, ancje tai ospedâi, une maniere di fâ “di gjenar” te definizion e te programazion strategjiche dai servizis clinics e assistenziâi, necessarie par garantî il dirit ae salût no dome des feminis ma ancje dai oms.

La iniziative e je stade fate cul contribût incondizionât di Theramex, cul patrocini di SIGO-Societât Taliane di Gjinecologjie e Ostetricie e ALOMAR ODV, e cu la partecipazion mediatiche di Adnkronos, Baby Magazine, Panorama della Sanità, Salutare e Tecnica Ospedaliera.