Open Day, prevenzion al feminin: ai 19 di Jugn iniziativis de struture di Gjinecologjie e Ostetricie de ASUFC

Lis struturis di Gjinecologjie e Ostetricie de ASUFC a partecipin ae prime edizion dal (H) Open Day dedicât ae prevenzion feminîl, cu la poie de Fondazione Onda ETS, miercus ai 19 di Jugn dal 2024; l’event al vûl promovi tes feminis une prevenzion corete, primarie e secondarie, par ducj i moments de vite, de pubertât ae menopause, daûr dai cambiaments ormonâi che a man a man si disvilupin e che a son tipics di ogni ete, cu lis relativis consecuencis su la salût e sul benstâ psicofisic.

La Fondazione Onda e à ricognossût a dutis lis struturis di gjinecologjie e di ostetricie de ASUFC il bolin rose pai percors dedicâts ae salût de femine. Par cheste ocasion si proponin iniziativis e visitis vuidadis tes sedis dal teritori.

I detais dal program a son chi sot:

Cividât

Incuintri cu la popolazion intitulât “La prevenzione dei tumori femminili: non perdere questa occasione!” (La prevenzion dai tumôrs feminîi: no stâ a pierdi cheste ocasion!) te scuele “A. Piccoli” di Cividât, miercus ai 19 di Jugn aes 18.00, inmaneât de struture di Ostetricie e Gjinecologjie e di Senologjie di Udin.

San Denêl

Incuintris cu la popolazion e visitis gratuitis. I incuintris si fasaran te aule Santovito, tal tierç plan dal paveon S dal presidi ospedalîr di San Denêl.

Des 9.00 aes 11.00 – Diretôr Dotôr Vanin Michele

“Dalla pubertà alla menopausa: l'importanza della prevenzione e dello stile di vita nel ciclo vitale della donna “ (De pubertât ae menopause: la impuartance de prevenzion e dal stîl di vite tal cicli vitâl de femine)

Des 11.10 aes 11.30 - Dotore Silvia Tamigi

• Presentazion de ufierte sanitarie dal ambulatori di ostetricie e gjinecologjie di San Denêl e di Codroip
• Presentazion des ativitâts ufiertis in cundizion di ricovar de bande de SOC Ostetricie Gjinecologjie di San Denêl

Des 11.30 aes 13.00 incuintri cu lis Ostetrichis - Dotore Silvia Tamigi e Dotore Angela Lattaruli

• Laboratori pratic: Perineu/paviment pelvic/pratiche metamorfiche

In plui, simpri miercus ai 19 di Jugn des 16.00 aes 18.00, si podaran fâ visitis e controi gjinecologjics in maniere gratuite: si à di prenotâ te segretarie de struture al numar 0432.949325 di lunis a vinars des 8.30 aes 18.30.

Tumieç

Visitis gratuitis des 8.30 aes 13.30 cu la dotore Chiara Paglietti tai ambulatoris di ostetricie e gjinecologjie (Ospedâl gnûf, prin plan): si à di prenotâ lant di persone li de segretarie, o pûr telefonant des 8.30 aes 14.30 di lunis a vinars al numar 0433 488240.