Oculistiche di Udin: gnove tecniche pe cure dal glaucome

Un sisteme dal dut inovatîf, che al permet – midiant di un piçul magnet - une impostazion plui svelte e sigure inte gjestion de pression intraoculâr dal pazient che al sofrìs di glaucome, malatie platade, croniche e progressive che e cjape il gnerf dal voli e che al pues puartâ ae pierdite de viste.

Pe prime volte in Friûl-Vignesie Julie, tal ospedâl Santa Maria della Misericordia di Udin, e je stade testade une gnove tecniche chirurgjiche pal tratament dal glaucome za tun stadi indenant, e dispès operât plui voltis. Ae fonde dal sisteme al è un dispositîf medic pal control de filtrazion clamât “Eyewatch” che al permet al chirurc di regolâ la pression dal voli cul ûs di une “pene” che e à un magnet.

“E je une gnove tecniche che e da la pussibilitât di frontâ cun plui sigurece un dai problemis grues de chirurgjie dal glaucome midiant di implants valvolârs, o sedi il control de pression intai prins dîs dopo dal intervent” – al sclarìs il dotôr Carlo Salati, diretôr de Struture Operative Complesse di Oculistiche dal Ospedâl di Udin, che cul so team al à fat il prin intervent cun cheste tecniche suntun pazient di plui o mancul 60 agns.

“Il pericul, di fat, al è che intai dîs dopo de operazion si verifichin dispès complicazions leadis a incressitis o a câls de pression endooculâr che al è dificil di controlâ: midiant di chest sisteme, invezit, il control de viertidure e de sierade de valvule al pues jessi fat intes fasis dal postoperatori in ambulatori, midiant apont dal dispositîf magnetic dedicât, cence passâ pe sale operatorie. Une volte cjatât l’obietîf pressori coret il sisteme al funzionarà in maniere autonome”.

In dì di vuê a son plui di 26 mil, in regjon, lis personis tocjadis dal glaucome, e di chestis la metât e fâs riferiment ae provincie di Udin (13.681 câs, cuintri dai 5.532 di Triest, dai 5.583 di Pordenon e dai 2.079 di Gurize). Daûr dai dâts ripuartâts de Aziende Sanitarie Universitarie Friûl Centrâl, cun di plui, intai ultins doi agns – segnâts de emergjence Covid - si son regjistradis mancul diagnosis, cuntune vore di probabilitât par vie de impussibilitât di fâ visitis. Si trate duncje di numars impuartants, che a sburtin la ASUFC a disfrutâ lis ecelencis professionâls che e à a disposizion.

Il Dotôr Carlo Salati, diretôr de Struture dal 1ⁿ di Fevrâr dal 2023, si è formât cul dotôr Paolo Brusini, espert intal tratament medic chirurgjic dal glaucome. “O darai continuitât ae ativitât fate dal gno predecessôr, pontant a mantignî alt ancje il nivel dal tratament dal glaucome – al siere Salati –. Viodût il risultât otim dal prin intervent, intai mês prossims o fasarìn altris intervents di chest gjenar”.