La Fondazion ONDA e premie il centri cefaleis de Cliniche Neurologjiche di Udin
miercus 9 di Novembar dal 2022
Il centri cefaleis de Cliniche Neurologjiche di Udin al è stât inserît inte prime mapadure a nivel statâl dai Centris Cefaleis.
La mapadure, fate de Fondazion ONDA (Osservatori Nazionâl su la Salût de Femine) e à individuât i centris pes cefaleis che a ufrissin servizis dedicâts ae gjestion de emicranie intai moments diviers de vite des feminis.
Intune cerimonie impuartante a nivel di dut il Stât talian, davuelte a Milan ai 26 di Otubar passât, la dot.e Sara Pez e à ricevût il ricognossiment in rapresentance de prof.e Mariarosaria Valente e dal grup di lavôr che jê e vuide.
In linie cui dâts epidemiologjics internazionâi, ancje lis personis curadis tal centri cefaleis de Cliniche Neurologjiche di Udin a son pal plui feminis, di ogni etât.
I servizis ufierts aes pazientis a son personalizâts e atents a dutis lis fasis de vite ormonâl e riprodutive de femine: si à une atenzion particolâr pai stîi di vite, e pal rûl impuartant che la nutrizion e il durmî a àn sui mecanisims fisiopatologjics dal mâl di cjâf.
Il centri al met a disposizion des pazientis ducj i trataments necessaris, cjapâts dentri i gnûfs anticuarps monoclonâi pe emicranie, la tossine botuliniche, i blocs pai dolôrs nevralgjics e, no ultin, un ambulatori nutrizionâl.
