Aprovât il percors clinic assistenziâl multidissiplinâr su la endometriosi e sul dolôr pelvic

Pal presidi ospedalîr Sante Marie de Misericordie di Udin e je une gnove e interessante sfide: lis pazientis cun endometriosi a saran assistudis in maniere dal dut complete. E je la prime esperience in Friûl-Vignesie Julie, une vore volude de Professore Lorenza Driul, diretore dal Dipartiment mame frut de ASUFC e cu la poie de Direzion Mediche.

Di fat, midiant dal lavôr dal grup fat di plui miedis specialiscj al è stât metût in vore un percors di diagnosi e di tratament de endometriosi e dal dolôr pelvic cronic che al à come obietîf primari la paziente: si vûl garantî une assistence di alte cualitât e specializade midiant di un percors complet e adatât daûr des necessitât de singule persone.

Par cheste gnove modalitât di cure a partecipin plui miedis specialiscj che a son organizâts par lavorâ in maniere coordenade cul fin di garantî une diagnosi e une cure adate, valide e imediade.

Tal grup dai miedis a partecipin il gjinecolic, il radiolic de risonance magnetiche, il gastroenterolic, il fisiatri, il specialist de terapie dal dolôr, l’urolic, il nutrizionist, il psicolic e il neurolic/neurofisiolic.

Il percors di cure al è gjestît dal grup di lavôr dai gjinecolics che par prins a ricevin la paziente tal ambulatori dedicât ae endometriosi: culì a viodin cualis che a son lis necessitâts e a indrecin la femine al specialist plui adat pal probleme che a àn cjatât, fasint daurman un program di apontaments pes visitis che i coventaran di fâ.

La professore Driul e à declarât: “O sin propit contents di podê screâ chest percors par une patologjie come che e je la endometriosi: o metìn a disposizion un grup di miedis specializâts dedicâts cun chê di assisti ogni paziente te sô singolaritât. Al è fondamentâl viodi de paziente in ducj i aspiets pussibii e par chest o sin simpri daûr a cirî ce che al pues miorâ la sô vite e garantîi une assistence specialistiche a 360°”.

Ce ise la endometriosi?

E je une patologjie gjinecologjiche buine, croniche e ricorinte tipiche des feminis in etât fertile. Si trate di une inflamazion croniche leade ae presince di fûcs di tiessût endometriâl fûr de cavitât uterine, che pal solit e tocje orghins e struturis pelvichis e adominâls che a cjapin dentri lis ovadoriis, la tube, il cuel dal utar, la vagjine, il peritoneu, il colon, il ret, la vissie e l’uretêr.

Si calcole che cirche il 10% des feminis in etât riprodutive e vedi cheste malatie: la percentuâl e aumente fin al 50% tes feminis no fertilis e si à un 20% pal dolôr pelvic. Dongje di cheste patologjie si zontin altris complicazions come par esempli il dolôr pelvic cronic: cheste cundizion e limite une vore la persone sul plan fisic, sociâl, lavoratîf, relazionâl, psicologjic e duncje e va frontade in maniere multidissiplinâr e cun plui modalitâts.

Di fat, stant che a son tancj i fatôrs che a causin la patologjie e la fisiopatologjie de malatie, doprâ une strategjie uniche nol baste; duncje, e devente necessarie une cure multidissiplinâr che e cjapi dentri terapiis farmacologjichis, chirurgjichis, riabilitativis, antalgjichis, psicologjichis; al è une vore impuartant lavorâ ancje sui stîi di vite e su la nutrizion.