Une gnove cjampane pe glesie dal Ospedâl Sante Marie de Misericordie
miercus 22 di Novembar dal 2023
La cjampane de Glesie dal Ospedâl di Udin e podarà biadelore tornâ a sunâ: sabide ai 18 e domenie ai 19 di Novembar e je di fat previodude la instalazion de gnove cjampane che e permetarà duncje ai fedêi di scoltâ il glon, ancje tai contors, fin a 3 voltis ogni dì.
Te fin de setemane e sarà la preparazion dal alozament e la predisposizion dal implant eletric pal sun e, ultin at dopo de messe de domenie, la sô instalazion complete e definitive.
Sabide la cjampane e sarà esponude te stesse Glesie par rimirândi i rilêfs di dongje; domenie, te ocasion de messe des 10.30, e sarà la benedizion solene.
La cjampane, volude une vore de capelanie dal Ospedâl, e à un valôr di cirche 4.850 euros, par buine part donâts des aziendis furnidoris, in particolâr de Aziende SpiMAC di Dongo (Como) che al cure la instalazion.
Altris aziendis donadoris a son la fondarie Allanconi che e à curât la fusion de cjampane, lis fusinis Paini di Bressie che a àn fat il gnûf batocj e la aziende Canonico Michelangelo che e à furnît il motôr pe movimentazion e la gnove centraline che e podarà programâ il sun de cjampane 3 voltis in dì.
La cjampane e pese 35 kg, cun note SiB4, e e puarte la steme dal ospedâl Sante Marie de Misericordie e i Sants Luîs Scrosoppi, Josef Moscati e il Crucifìs.
La cjampane e je stade fondude cu la tecniche de fusion "a cere pierdude” e pe sô realizazion la fondarie e à metût cirche un mês.
Don Michele de Capelanie: “Un ringraciament al va ae Direzion Gjenerâl, al ufici tecnic di ASUFC e a dutis lis aziendis che a àn permetût cheste impuartante opare par ducj i pazients e dipendents dal Sante Marie de Misericordie. I glons de cjampane a son un simbul impuartant: te nestre tiere di secui incà a segnin i moments de zornade e ai fedêi in particolâr a ricuardin la clamade ae preiere e la vicinance di Diu. Par esempli, il sun de cjampane di misdì al ricuarde l’anunzi dal agnul a Marie e duncje la incarnazion dal Verp”.